وان.. هەموومان هاوخەمتانین

لە ٢٣/١٠/٢٠١١ بومەلەرزەیەک بە گوڕی ٧ ریشتەر شاری وانی لە وڵاتی تورکیا هەژاند و سەدان خەڵکی سیڤیلی ئەو شارە و دەورووبەری بوون بە ژێر دیوار و سەقفی خانووەکانیانەوە و گیانیان لە دەستدا و سەدانی تریش بە برینداری رەوانەی نەخۆشخانەکان کران و چەندین ماڵ و باڵەخانە رووخان و کارەساتێکی مرۆیی گەورە روویدا. گەورەیی کارەساتەکە ویژدانی مرۆڤایەتی هەژاند و میدیاکانی جیهان مەرگەساتەکەیان بۆ جیهان دەگواستەوە. مردنی مرۆڤەکان و بێ خانە و لانەبوونی خەڵکی سیڤیل دڵی خەڵکی هەرێمی کوردستانی داخورپاند و هەموانی دڵتەنگ کرد و رۆحی بەهاناوەچوونی خەڵکی کوردستانی وروژاند.

بەمەبەستی بەهاناوەچوونی خەڵکی کارەساتباری وان، دەزگای خێرخوازیی بارزانی هەڵمەتێکی کۆکردنەوەی هاوکاری راگەیاند و داوای لە خێرخوازانی کوردستان کرد هاوکارییەکانیان لە رێگەی دەزگاوە بگەیەننە خەڵکی زیان لێکەوتووی شاری وان و دەوروبەری. هەڵمەتەکە یەک مانگی خایان، لەو ماوەیەدا کوردستانیان لە هەر چوار پارچەی کوردستان بە پیر بانگەوازەکەی (دەزگای خێرخوازیی بارزانی) یەوە هاتن، خەمخۆرانە پشکداریان لەم پرۆژە خێرخوازییە گەورەیەدا کرد و بەپێی کڕین و پێداویستییەکانی درووستکردنی (کەرەڤانە) لەلایەن کەسایەتی و خاوەن کۆمپانیا و خێرخوازانەوە بڕی (هەشتا و پێنج ملیۆن و دووسەد و هەشتاو پێنج هەزار) دۆلار تەرخانکرا و کۆی خەرجی هاوکارییەکانی بریتی بوو لە (نۆ سەد و چل و نۆ هەزار و دووسەد دۆلار).

هاوکارییەکان بریتی بوو لە ٤٠٠ کەرەڤانە بە هەموو پێداویستییەکانی ماڵەوە لە لایەن (دەزگای خێرخوازیی بارزانی)یەوە بۆ خەڵکی لێقەوماوی وان ئامادەکرا.
رێکەوتی ١٧/١١/٢٠١١ لە مەراسیمێکدا لە ژێر چاودێری رێزدار سەرۆک مەسعود بارزانی و بە ئامادەبوونی رێزدار مەسروور بارزانی سەرۆکی بۆڕدی دامەزرێنەرانی دەزگای خێرخوازیی بارزانی و نوێنەرانی حکوومەتی هەرێمی کوردستان و وڵاتان و خەڵکی خێرخواز و هاریکاربەخش لە هەولێری پایتەخت، کاروانی یەکەمی هاوکارییەکان بەرەو شاری وان بەڕێکەوت.

Share on facebook
Facebook
Share on email
Email
Share on twitter
Twitter
Share on linkedin
LinkedIn
Share on pinterest
Pinterest