چەند وشەیەک
دەربارەی ئێمە
مێژوو
دەزگای خێرخوازیی بارزانی لە ژێر رۆشنایی وتەی بارزانیی نەمر "شانازییە بۆ مرۆڤ خزمەتکاری میللەتی خۆی بێت" لە ساڵی ٢٠٠٥ دامەزراوە.
- 2005 - دەزگای خێرخوازیی بارزانی دامەزرا.
- 2009 - پرۆژەی ئازیزان دەستی پێکرد.
- 2014 -هاوکاری گەیاندە ئاوارەکان لەسەر چیای شنگال.
- 2015 - دەزگا بەڕێوەبردنی سەرجەم کەمپەکانی لە پارێزگای هەولێر وەرگرت.
- 2016 - دەزگا بووە ئەندامی راوێژکار لە ECosOC.
- 2016- لە وەزارەتی دەرەوەی كوەیت وەك رێكخراوی خێرخوازیی ددانی پێدا نراوە.
- 2018 - دەزگا بووە نوێنەری سفێر لە هەرێمی کوردستان.
- 2020- بە فەرمی لەلایەن كۆمیسیۆنی رێكخراوە خێرخوازییەكانی بەریتانیاوە مۆڵەتی كاركردنی وەرگرتووە.
- 2020- بەڕێوەبردنی کەمپەکانی ئاوارە و پەنابەران لە پارێزگای دهۆک.
دەزگای خێرخوازیی بارزانی دەزگایەکی ناحكوومی و ناسیاسی و قازانج نەویستە، له ساڵی 2005 له هەولێری پایتەختی هەرێمی كوردستان – عێراق دامەزراوە و بەڕێز “مەسرور بارزانی” سەرۆكی بۆردی دامەزرێنەرانی دەزگاكەیە. لە ژێر وتەیەكی “مستەفا بارزانی” كە دەفەرموێت: “شانازییه بۆ مرۆڤ خزمەتكاری میللەتی خۆی بێت”، دەزگای خێرخوازیی بارزانی دەستی بە كاركردن كردووە. مۆڵەتی كاركردنی لەلایەن حكومەتی هەرێمی كوردستان و حكومەتی عێراق وەرگرتووە. هەروەها له ویلایەته یەكگرتووەكانی ئەمریكا لە ساڵی 2016 مۆڵەتی كاركردنی پێ دراوە. له كۆبوونەوەی مانگی نیسانی ساڵی 2016 ی ئەنجومەنی كارگێڕی و هەماهەنگیی نەتەوە یەكگرتووەكان، دەزگای خێرخوازیی بارزانی وەك ئەندامی راوێژكاری له ئەنجومەنی ئابووری و كۆمەڵایەتیی”ECOSOC” قبووڵ كرا. دەزگای خێرخوازیی بارزانی لە مانگی 4ی ساڵی 2020 بە فەرمی لەلایەن كۆمیسیۆنی رێكخراوە خێرخوازییەكانی بەریتانیاوە مۆڵەتی كاركردنی پێ درا. لە ساڵی 2016 لە وەزارەتی دەرەوەی كوەیت وەك رێكخراوی خێرخوازیی ددانی پێدا نرا.
كارە مرۆییەكانی دەزگای خێرخوازیی بارزانی سنووری هەرێمی كوردستان و دەوڵەتی عێراقی تێپەڕاندووه، لە هەر یەك له وڵاتانی “توركیا، سووریا، سربیا، ئوسترالیا، سعودیە، بەنگلادش، لوبنان، یەمەن، باشووری سودان و…هتد”، خزمەتی مرۆڤایەتی كردووە.
پرۆژەكانی دەزگا لە رێگەی “سپۆنسەر و دۆنەرەكان”یەوە پاڵپشتی دەكرێن و خۆبەخشەكان رۆڵیان لە چالاكییەكان هەیە.
ئۆفیسی سەرەكیی دەزگای خێرخوازیی بارزانی لە هەولێری پایتەختی هەرێمی كوردستان – عێراقە و لە هەر شوێنێك پێوست بكات بۆ جێبەجێكردنی پرۆژەكان ئۆفیس دەكاتەوە.
لە مانگی (1) ی ساڵی (2023) دەزگای خێرخوازیی بارزانی لە پێناو گرنگیدانی زیاتر بە خزمەتگوزارییەكانی لە بواری ئیداری و كارە خێرخوازییەكانی بڕوانامەی ( ISO 9001:2015 ) ی وەرگرت
پەیاممان
روانینمان
بینینی جیهانێکی بێ هەژاری، کە تیایدا مرۆڤەکان لە خزمەتگوزاریی پێویست بۆ پەروەردەیەکی بونیادنەر لە ژینگەیەکی پارێزراودا، بە یەکسانی سوودمەند دەبن.
سیاسەتی جۆری
ئێمە چی دەکەین
دەزگای خێرخوازیی بارزانی لە ٠ ١ سێکتەری جیاوازدا هاوکاریی مرۆیی پێشکەشی ئاوارە، پەنابەر و خەڵکی خۆجێی دەکات
ئاسایشی خۆراك
ئەم سێكتەرە بەپێی رێنماییەكانی پڕۆگرامی خۆراكی جیهانیی(WFP) لەسەر دابینكردنی خۆراك كار دەكات.
دەزگای خێرخوازیی بارزانی بە شێوەیەكی فراوان لەم سێكتەرەدا كار دەكات، لە كاتی كارەساتەكاندا خۆراكی گەرم و ئامادە و دواتر خۆراكی وشك بە سەر لێقەوماواندا دابەش دەكات، هەروەها هەوڵی زیادكردنی بەرهەمی خۆراك لە رێگەی راهێنان و خانووی پلاستیكییەوە دەدات.
ئاو و ئاوەڕۆ
ئەم سێكتەرە كار لەسەر دابینكردنی ئاو و خزمەتگوزاریی ئاوەڕۆ و بایەخدان بە پاكوخاوێنیی تاك و كۆمەڵگە دەكات.
دەزگای خێرخوازیی بارزانی كار لەسەر دابینكردنی ئاوی پاك بۆ ناوچە زیان لێكەوتووەكان، دروستكردنی تۆڕی ئاو و لێدانی زێراب، دانانی توالێت، هەڵمەتی پاكوخاوێنی، بڵاوكردنەوەی رۆشنبیریی پاكوخاوێنی و دابەشكردنی پێداویستیی پاكوخاوێنی دەكات.
پەناگە
ئەم سێكتەرە لەسەر شێوازی نیشتەجێكردنی ئاوارە، یان پەنابەران لە كاتی قەیرانەكان كار دەكات،
لەگەڵ دابینكردنی(خێوەت، كەرەڤانە، خانووی كۆنكرێتی، نۆژەنكردنەوەی خانووی ناوچە وێرانبووەكانی جەنگ، هۆڵی پێشوازی و حەواندنەوەی لێقەوماوان). دەزگای خێرخوازیی بارزانی لە ساڵی 2014 یەكەم كەمپی لە پارێزگای هەولێر بەڕێوە برد. هەتا ساڵی 2021 بە هەماهەنگی لەگەڵ كۆمیسیۆنی باڵای پەنابەرانی جیهان لە هەر دوو پارێزگای هەولێر و دهۆك بەڕێوەبردنی 30 كەمپی ئاوارە و پەنابەرانی لە ئەستۆ گرت.
پەروەردە و پەرەپێدان
ئەم سێكتەرە بایەخ بە بواری پەروەردە و فێركردن و پەرەپێدان دەدات و پێكدێت لە دابینكردنی پێداویستیی خوێندن، خولی هۆشیاری پەروەردەیی،
بنیادنان و نۆژەنكردنەوەی قوتابخانە و ناوەندەكانی راهێنانی پەروەردەیی، خوێندنی فەرمی، بڵاوكردنەوەی رێنمایی و هاندان بۆ بەردەوامیدان بە خوێندن. هەروەها پێداویستیی خوێندنی ساڵانە بۆ قوتابیان دابین دەكات.
ژیانەوانی
ئەم سێكتەرە بریتییە لە پڕۆگرامێكی درێژخایەن بۆ پەرەپێدانی تواناكانی تاك بە مەبەستی (فێركاری، دروستكردنی بەهرە، رەخساندنی دەرفەتی كار
و فەراهەمكردنی داهات بۆ تاك و خێزان لە كاتی قەیرانەكاندا). دەزگای خێرخوازیی بارزانی لە رێگەی ناوەندەكانی رۆشنبیری و مەشقە پیشەییەكانیەوە ساڵانە بە سەدان كەس بەشداری پێ دەكات لە خولەكانی (كۆمپیوتەر، دروومان، مەجاری، بەرهەمهێنانی خۆراك، كاری دەستی و…هتد) هەروەها پڕۆژەكانی سیستەمی (پارە بەرانبەر كار) بۆ كاركردن لە پڕۆژەكان جێبەجێ دەكات.
یارمەتیی نەختینە
ئەم سێكتەرە كار لەسەر پڕۆگرامی دابینكردنی هاوكاریی ماددی بە مەبەستی دەستەبەركردنی خزماتگوزاری و پێداویستیی سەرەتایی ژیان بۆ خێزانە كەمدەرامەتەكان دەكات.
دەزگای خێرخوازیی بارزانی لە ساڵی 2009 لە چوارچێوەی پڕۆژەی چاودێریی ئازیزان بۆ منداڵانی بێ باوك دەستی بە دابەشكردنی هاوكاریی نەختینە كردووە، هەتا ئێستا نزیكەی 18،000 منداڵی بێ باوكی لە وەرگرتنی هاوكاریی ماددیی مانگانە سوودمەند كردووە، هەروەها لە پڕۆژەیەكی دیكە ئافرەتانی بێ هاوژین مانگانە هاوكاریی ماددی وەردەگرن.
پاراستن
كار لەسەر بەهێزكردنی ئاسایشی جەستەیی و دەروونی و كەمكردنەوەی ترس بۆ ئەو كەسانە دەكات كە لە ژێر هەڕەشە و ترسدان،
لە رێگەی راهێنانەكان و پاراستنی مافی مرۆڤ، مافی منداڵان و ئافرەتان، بایەخی تەواو بە هۆشیاریی كۆمەڵایەتی بۆ دووركەوتنەوە لە دەستدرێژیی سێكسی و تاوان و توندوتیژی لەسەر بنەمای رەگەز دەدات.دەزگای خێرخوازیی بارزانی لە رێگەی سەنتەرەكانیەوە لەناو كەمپ و دەرەوەی كەمپەكان گرنگی بە پاراستنی ئافرەتان و منداڵان دەدات، كار بۆ دوورخستنەوەی خەڵكی لێقەوماو لە كێشە كۆمەڵایەتییەكان و توندوتیژیی دەروونی و جەستەیی دەكات. هەروەها پلانی بۆ سەوزكردن و پاراستنی ژینگە هەیە.
تەندروستی
ئەم سێكتەرە بایەخ بە كەرتی تەندروستی و جەستەیی و دەروونی و كۆمەڵایەتی دەدات، لە رێگای دابینكردنی خزمەتگوزاریی پزیشكی
وەك:(دەرمان، پزیشك، بنكەی تەندروستی، پێداویستیی تەندروستی) بۆ پاراستنی خەڵك و بڵاوكردنەوەی هۆشیاریی تەندروستی بەپێی رێنماییەكانی رێكخراوی تەندروستیی جیهانی(WHO).
دەزگای خێرخوازیی بارزانی كار لەسەر دروستكردن و نۆژەنكردنەوەی بنكەی تەندروستی و دابینكردنی پێداویستیی تەندروستی و هەڵمەتی هۆشیاركردنەوەی خۆپاراستن و دروستكردنی نەخۆشخانەی گەڕۆك دەكات، هەروەها لە پڕۆژەیەكی بەردەوام كورسیی جووڵاو بە سەر خاوەن پێداویستیی تایبەتدا دابەش دەكات.
کەلوپەلی ناخۆراکی
ئەم سێكتەرە بە شێوەیەكی گشتی پێكدێت لە دابینكردنی پێداویستییە سەرەتاییەكانی ژیان وەك (چێشتخانە، كەلوپەلی زستانە، بەتانی، دۆشەك،
پارەی كاش، جلوبەرگ و نەوت). دەزگای خێرخوازیی بارزانی كار لەسەر هەر پێداویستییەكی رۆژانە دەكات كە بۆ ژیانی ئاسایی بەكار بێت و هەوڵی دابینكردنی بۆ كەمدەرامەتان دەدات، لەوانە: (پێداویستیی چێشتخانە، پێخەف، ئامێرەكانی گەرمكردنەوە و ساردكردنەوە و جلوبەرگ و…هتد).
بەڕێوەبردن و هەماهەنگیی کەمپەکان
ئەم سێكتەرە پێكدێت لە بەڕێوەبردن و هەماهەنگیی كەمپەكان كە لە ژێر رێنمایی و بە هاوبەشی لەگەڵ كۆمیسیۆنی باڵای پەنابەران(UNHCR) و ناوەندی هاوبەشی هەماهەنگیی قەیرانەكان بە مەبەستی فەراهەمكردنی خزمەتگوزاری بۆ دانیشتووانی كەمپەكان.
دەزگای خێرخوازیی بارزانی بە ئامانجی زیاتر پێشخستنی خزمەتگوزاری و پێشكەشكردنی هاوكاریی جۆراوجۆر و خستنەڕووی سەرنج و پێشنیاری نوێ لە بارەی بارودۆخی دانیشتووانی كەمپەكان، بەشداریی سەرجەم كۆبوونەوەكانی هەماهەنگی و بەڕێوەبردنی كەمپەكانی هەرێمی كوردستان دەكات.
