Dezgeha Xêrxwaziya Barzanî, bi rêya nûnertiya xwe li Amerîkayê, bernameyeke taybet bi navê «Parêzvanên Mirovahiyê» li Avahiya Rayburn, li Kongreya Amerîkayê li Washingtonê, pêşkêş dike; ev jî pengaveke ji bo nasandina zêdetir û firehkirina têkiliyên mirovî û civakî yên Dezgehê di asta navneteweyî de.
Xunav Emîn, Nûnerê Dezgeha Xêrxwaziya Barzanî li Amerîkayê, serperiştiya bernameyê dike û ragihand, hejmareke mezin ji kesayetiyên siyasî û heta endamên Kongreyê jî di dema birêveçûna merasîmê de amade dibin, da ku ji nêzîk ve bi kar û çalakiyên yek ji çalaktirîn dezgehên di warê alîkariya mirovî de ku wekî “Parêzvanên Mirovahiyê” kar dike, nas bikin ku ew jî Dezgeha Xêrxwaziya Barzanî ye.
Ev bernameya ku biryar e roja Duşemê, 9/11/2026, ji saet 2:15 heta 5:15ê piştî nîvro were lidarxistin, bi navê «Rêzgirtina ji Wêrekiyê, Rêzgirtina ji Mirovahiyê û Zindîkirina Hêviyan» balê dikişîne ser nirx û bihayê xizmetkirin, qurbanîdan û hevkariya mirovî.
Di çarçoveya bernameyê de, rêz ji ezmûn û qurbanîdana leşkerên Amerîkayê û Pêşmergeyên Kurdistanê tê girtin; bi taybetî ew hevkariya hevbeş a ku li dijî terorîzma DAIŞê û ji bo parastina jiyana welatiyan û bihêzkirina ewlehiyê hatiye kirin. Her wiha, girîngiya pêkvejiyana aştiyane ya pêkhateyên olî û neteweyî, rêzgirtina ji cudahiyan û parastina azadiya olî û nasnameyên çandî tê raberkirin.
Beşeke din a bernameyê taybet e bi rêzgirtin û pesindana wan kes û aliyên ku bexşîn û piştgiriyên wan bûne sedema berdewamiya proje û çalakiyên mirovî yên Dezgeha Xêrxwaziya Barzanî ji bo malbatên hejar û hewcedar û koçber û penaberan.
Birêvebirina van cure bernameyan di asteke navneteweyî de û li cîhekî girîng wekî Kongreya Amerîkayê, derfeteke ji bo nasandina zêdetir a erk û peyama mirovî ya Dezgeha Xêrxwaziya Barzanî, nîşandana ezmûna wê ya salane di warê alîkariya mirovî de û têkilîkirina bi sazî û kesayetiyên xêrxwaz û piştgirên karên mirovî re.
Dezgeha Xêrxwaziya Barzanî, ku ji sala 2005an ve di warê xizmetkirina mirovahiyê de çalak e û di sala 2016an de destûra kar li Amerîkayê wergirtiye, bi rêya hevkarî û hevpeymaniyên xwe yên navneteweyî hewl dide, qada xizmetên xwe yên mirovî firehtir bike û piştgiriya zêdetir ji bo wan kesan dabîn bike ku pêdiviya wan bi alîkarî û lênêrînê heye.
Ev bername di 9ê Mijdara 2026an de, ji aliyê Xunav Emîn, Nûnerê Dezgeha Xêrxwaziya Barzanî li Amerîkayê ve tê birêvebirin.
