Hevkarî û hevbeşiya di navbera Dezgeha Xêrxwaziya Barzanî û rêxistinên mirovî yên Almanî de, yek ji ezmûnên girîng ên karê hevbeş ê navneteweyî ye li Herêma Kurdistanê û li herêmên derveyî Herêmê. Ev hevkarî di salên borî de roleke berçav di bersivdayîna krîzên mirovî, başkirina xizmetên tenduristî û perwerdeyî, piştgirîkirina zarok û malbatên zirar dîtî û pêşxistina şiyanên ciwanan de hebûye.
Ev rapor ji du beşan pêk tê: Beşa yekem taybet e bi projeyên rasterast û hevbeş ên Dezgeha Xêrxwaziya Barzanî re ligel rêxistinên Almanî, beşa duyem jî kurtasîya çalakî û destkeftiyên berfirehtir ên hevkariyên Almanî di warê mirovî û pêşkeftinê de radixe ber çavan.
Beşa Yekem: Projeyên rasterast û hevbeş ên Dezgeha Xêrxwaziya Barzanî ligel rêxistinên Almanî
1. Rêxistina Gundê Aştiyê Friedensdorf International
Hevkariya di navbera Dezgeha Xêrxwaziya Barzanî û rêxistina Friedensdorf de bi taybetî di warê tenduristî û piştgirîkirina zarokan de girîngiyeke mezin hebûye.
Ji projeyên herî girîng klînîka gerok li Dihokê, çareserkirin û dermankirina zarokên nexweş, dabînkirina alîkariyê ji bo zarokên Kampa Mam Reşan û pêşkêşkirina pêdiviyên bijîşkî ji bo nexweşxaneyên Şingalê, Mala Girnijîn in.
2. Rêxistina Caritas Essen Caritas
Rêxistina Caritas yek ji hevbeşên girîng ên Dezgeha Xêrxwaziya Barzanî bûye, ku hevkariyên wê gelek warên tenduristî, perwerde, parastina zarokan, piştgiriya civakî û pêşxistina şiyanan digire nav xwe.
Ji projeyên hevbeş ên herî girîng vekirina yekîneya tenduristiya diranan li Şingalê di sala 2026an de, piştgirîkirina Malên Girnijîn li Şêxan, Sinûnê û Amêdiyê, û damezrandina Navenda Barzanî li Efrînê di sala 2023an de bûye.
Her wiha, di warê perwerdeyê de hevkariya Dibistana Daristanê di sala 2024an de û dabînkirina çente û defteran di sala 2023an de hatiye kirin. Di warê pêşxistina ciwanan de jî, perwerdeya teknolojiyê û zêdekirina derfetên kar di sala 2023an de hatiye piştgirîkirin.
Hevkariyên din jî piştgirîkirina koçberên Şingalê di sala 2022an de, rêkxistina çalakiya cejna Sersala Êzdî, dabînkirina jeneratoreke karebayê ji bo gundê Mêrgê li Bexşîqê û dabînkirina amûrên nefesdanê ji bo Rojavayê Kurdistanê di sala 2021ê de ne.
3. Rêxistina Destê Alîkariyê Desti Yarmati
Di sala 2024an de, rêxistina Desti Yarmati beşdarî di dabînkirina beşek ji pêdivî û piştgiriya darayî ya projeya Mala Girnijîn de kiriye.
4. Rêxistina Franziskaner
Hevkariya rêxistina Franziskaner ligel Dezgeha Xêrxwaziya Barzanî di warê piştgirîkirina koçber û zirar dîtiyên krîza Sûriyeyê de kom bûye.
Rêxistina SEZ
Yek ji wan rêxistinan e ku bi rêya Caritasê û rasterast jî ligel Dezgeha Xêrxwaziya Barzanî alîkariya xelkê hejar û kêmdahat kirine û bandoreke rasterast hebûye.
Beşa Duyem: Rol û bandora berfirehtir a hevkariyên Almanî li Herêma Kurdistanê (Ew proje û destpêşxerîyên ku rêxistinên Almanî rasterast kirine).
Ji sala 2011ê ve, bi taybetî piştî krîza koçberbûnê ya sala 2014an, rêxistin û saziyên Almanî roleke girîng di piştgirîkirina koçber û penaberên Herêma Kurdistanê de lîstine. Ev piştgirî bi taybetî malbatên Êzdî û Mesîhî û wan civakên ku ji ber şer û koçberiyê zirar dîtine girtiye nav xwe.
Di warê niştecihbûn û alîkariya mirovî de, dabînkirina karavan, kon, xwarin, cil, gazoil, jeneratoreke karebayê û pêdiviyên bingehîn alîkariya başkirina rewşa jiyana malbatên koçber kiriye. Her wiha, cîbicîkirina projeya enerjiya rojê li Kampa Mam Reşan pengaveke girîng bûye ji bo başkirina xizmeta karebayê.
Di warê perwerdeyê de, hevkariya rêxistina GIZ û aliyên Almanî di dabînkirina pirtûkxane, pirtûkên xwendinê, amûrên komputerê, perwerde û piştgiriya xwendina zarokên kampan de xuya bûye. Her wiha, kursên zimanê Îngilîzî, komputer û perwerdeya pîşeyî, ligel bernameyên şiyankirinê ji bo zêdetirî 300 kesên xwedî pêdiviyên taybet, derfetên fêrbûn û beşdariya civakî firehtir kirine.
Di warê tenduristiyê de, dabînkirina klînîk, bijîşk, bijîşkê diranan, otomobîla ambulansê û navendên piştgiriya derûnî li kampên Şêxan, Mam Reşan û Êsiyan, beşek bûye ji hewldanên başkirina gihîştina dermankirin û lênêrîna tenduristiyê.
Di heman demê de, çêkirina yarîgehan, dabînkirina kelûpelên werzîşî û rêkxistina çalakiyên civakî, derfetên zêdetir ji bo zarok û ciwanan çêkirine da ku di jîngeheke guncawtir de beşdar bibin.
Di asta sazî û dîplomasiya mirovî de jî, serdana şandeyên Almanyayê, di nav de parlamenter û berpirsên herêmên Nordrhein-Westfalen û Baden-Württemberg, ligel hevahengiya JCC, Parêzgeha Dihokê û saziyên ragihandinê yên wekî Funke Media Group, alîkariya nasandina rewşa koçberan û bihêzkirina têkiliyên navneteweyî kiriye.
Dirêjkirina rêkeftina hevkariyê ligel Hikûmeta Baden-Württembergê ji bo pênc salan jî, gaveke girîng bûye ji bo berdewamiya hevbeşiyê di warên karê mirovî, perwerdeya kadroyan, danûstandina çandî û çalakiyên perwerdeyî û werzîşî de.
Nirxandina giştî ya bandora hevkariyên Almanî
Bi giştî, hevkariya rêxistin û saziyên Almanî ligel Dezgeha Xêrxwaziya Barzanî û saziyên têkildar ên Herêma Kurdistanê, roleke girîng di kêmkirina bandorên koçberiyê, başkirina xizmetên bingehîn û piştgirîkirina tebeqeyên lawaz ên civakê de lîstiye.
Girîngiya van hevbeşiyan tenê di dabînkirina alîkariya madî û darayî de nîne, belku di veguhestina pisporiyê, pêşxistina şiyana mirovî, bihêzkirina baweriya di navbera saziyan de û çêkirina bingeheke ji bo hevkariya demdirêj de ye jî.
Ev ezmûn mînakeke girîng e ji hevbeşiyeke mirovî û navneteweyî, ku tê de hevkarî ji alîkariya lezgîn pêş ketine ber bi piştgiriya berdewam, şiyankirin û çêkirina derfetên baştir ji bo pêşeroja civakê ve.
Di dîdara herî dawî de jî roja Çarşemê, 7/10/2026, rêxistina Caritasa Almanyayê, bi mebesta derbirîna spasiyê û rêzgirtinê ji bo rol û hewldanên Dezgeha Xêrxwaziya Barzanî wekî yek ji hevbeşên girîng ên Caritasê li Kurdistanê, mertala rêzlênanê pêşkêşî Dezgeha Xêrxwaziya Barzanî kir.
Her wiha bi boneya derbasbûna deh salan ji karê hevbeş û hevbeşiya mirovî ya Dezgeha Xêrxwaziya Barzanî ligel rêxistin û saziyên medyayî yên Almanyayê, roja Duşemê, 12/10/2026, mertala rêzlênanê yê rêxistina Destê Hevkariyê pêşkêşî Serokê Dezgeha Xêrxwaziya Barzanî hate kirin.
Bi giştî ya projeyan: 22 proje
Bi giştî ya sûdmendan: 48,510
Bi giştî ya pereyê ji aliyê bexşeran ve: 1,660,301,519 dînar
Bi giştî ya para Dezgehê: 681,292,850 dînar bûye.
