هەولێر… ئاوی خواردنەوە بۆ 21 هەزار خێزان دابین دەكرێت

رێككەوتی 6/7/2021 بەمەبەستی دابینكردنی ئاوی خواردنەوە بۆ گەڕەكانەی شاری هەولێر كە ماوەیەكە كەمئاون، دەزگای خێرخوازیی بارزانی لە پرێس كۆنفرانسێكی رۆژنامەوانیدا هەڵمەتی دابەشكردنی ئاوی خواردنەوەی بۆ گەڕەكە كەمئاوەكانی شاری هەولێر راگەیاند كە بۆ ماوەی مانگێك درێژەی دەبێت تیایدا 21.600 خێزان سوودمەند دەبن.
لە پرێس كۆنفرانسەكەدا، بەڕێز موسا ئەحمەد سەرۆكی دەزگای خێرخوازیی بارزانی باسی لەم پرۆژەیە كرد و رایگەیاند: ئێمە ساڵانە بەشێوەیەكی بەردەوام لەوەرزی هاویندا پرۆژەی گەیاندنی ئاوی خواردنەوەمان بۆ ئەو گەڕەكانەی ناو شاری هەولێر هەبووە كە گرفتی كەمئاوییان دەبوو. بۆ ئەمساڵیش بەداخەوە بەهۆی گۆڕانی كەشوهەوا و وشكەساڵییەوە چەندین گەڕەكی شاری هەولێر رووبەڕووی گرفتی كەمئاوی بوونەتەوە. هەوڵدەدەین بەم پرۆژەیە ئاوی خواردنەوە لەڕێگەی تانكەرەوە بۆ نزیكەی 21 هەزار خێزان بۆ ماوەی مانگێك دابین بكەین.
هەروەها سەرۆكی دەزگای خێرخوازیی بارزانی ئاماژەی بەوەدا: ئەوەی لە توانای ئێمەدابێت درێغی ناكەین لە خزمەتكردنی خەڵكی كوردستان و بەبێ جیاوازی لە هەر شوێنێك كێشەو گرفتێكی لەم جۆرە هەبێت، ئێمە ئامادەین هاوكارییەكانمان بگەیەنن و خزمەتی خەڵكی خۆمان بكەین.
شایانی باسە، بۆ ئەم پرۆژەیە، دەزگای خێرخوازیی بارزانی بڕی 85 ملیۆن دیناری عێراقی بۆ رێككارە ئیداریی و لۆجستیەكان و دابینكردنی ئاوی خواردنەوە و كرێی هاتووچۆ تەرخانكردووە.

tankar2
tankar
previous arrow
next arrow
Share on facebook
Facebook
Share on email
Email
Share on twitter
Twitter
Share on linkedin
LinkedIn
Share on pinterest
Pinterest