ئەنجامدانی وۆركشۆپێك لە چوارچێوەی پلانی هەرێمی بۆ مافەكانی مرۆڤ

سەرەتا بەڕێز موسا ئەحمەد سەرۆكی دەزگای خێرخوازیی بارزانی، وێڕای بەخێرهاتنی ئامادەبووان: بەڕێزان(نوێنەرانی رێكخراوەكان، رێكخەری راسپاردە نێودەوڵەتییەكان لە حكومەتی هەرێمی كوردستان و پەرلەمانتارانی لێژنەی پەروەردە و خوێندن لە پەرلەمانی كوردستان)، ئاماژەی بەوە كرد كە دەزگای خێرخوازیی بارزانی لە كاتی دامەزراندنیەوە لە ساڵی 2005 تا ئێستا، یەكێك لە سێكتەرەكانی كار و چالاكییەكانی، بایەخدان و گرنگیدانی تایبەت بووە بە پەروەردە و فێركردن. هاوكات گوتی: “ئێمە هزری بارزانیی نەمرمان كردووەتە بنەما بۆ كاركردن لەسەر پەروەردە، كە فەرموویەتی: “چەکی زانست بکەنە شانتان و هەموو توانایەكتان بخەنە كار بۆ رزگارکردنی گەلەکەتان لە نەخوێندەواری”، ئەوەش سەلمێندراوە كە هیچ گەلێك ناتوانێت وەبەرهێنانی مرۆیی بكات، ئەگەر بایەخی تەواوی بە سێكتەری پەروەردە و فێركردن نەدابێت، هەر پەروەردەشە پێشكەوتنی ئابووری و بونیادنانی داهاتوویەكی گەش و پرشنگدار بۆ كۆمەڵگە مسۆگەر و دەستەبەر دەكات”.
سەرۆكی دەزگای خێرخوازیی بارزانی ئاماژەی بەوەش كرد، كاتێك بەڕێز مەسعود بارزانی سەرۆكی هەرێم بووە، داوای كردووە “لە هەر گوندێكی كوردستان ئەگەر دوو خانەوادەش هەبن، پێویستە قوتابخانەیان بۆ بكرێتەوە”.
ئەوەشی خستە روو كە دوای هاتنی بە لێشاوی ئاوارە و پەنابەران و گیرسانەوەیان لە كەمپەكاندا، دەزگای خێرخوازیی بارزانی بایەخی بە بنەڕەتیترین مافی ئەوان داوە، كە دەستەبەری فێربوون و خوێندن بووە. ئەوەشی ئاشكرا كرد كە تەنیا لە سێ ساڵی رابردوو 51 پرۆژەی جۆراجۆر لە بواری پەروەردە و فێركاری و پەرەپێدانی توانای قوتابیان ئەنجام دراون، كە 147746 قوتابی لێی سوودمەند بوون.
یەكێك لەو تەوەرانەی كە سەرۆكی دەزگای خێرخوازیی بارزانی پێداگری لەسەر كرد، پرسی دابڕانی قوتابیان لە خوێندن بوو. هۆكارەكانیشی گەڕاندە بۆ ئاوارەبوونی هاووڵاتیان بە هۆی كردەوە تیرۆریستییەكان، پەناخوازی لە وڵاتانی دوور لە شەڕ، هەروەها تۆپبارانەكانی كۆماری ئیسلامیی ئێران و بۆمبارانكردنی گوندەكانی سەر سنوور لە لایەن توركیاوە، كە بە ناچاری ژمارەیەكی زۆر لەو گوندانە چۆڵ كراون.
بەڕێز موسا ئەحمەد، ئەوەشی راگەیاند كە دەزگای خێرخوازیی بارزانی هاوكاریی دارایی زیاتر لە 18،000 منداڵی ئازیز(بێ باوك) دەكات و یەكێك لە مەرجەكانیشی ئەوەیە كە منداڵ لە تەمەنی شەشە ساڵی بچێتە بەر خوێندن و پاڵپشتیی قوتابخانەكەشی بۆ دەزگا بهێنن. هەروەها ساڵانەش هەموو ئەو ئازیزانەی كە نمرەیان لە سەرووی 90 بێت، خەڵات دەكرێن. باسی ئەوەشی كرد كە هەر لە درێژەی خزمەتكردنی پرۆسەی پەروەردە، دەزگای خێرخوازیی بارزانی لە سەر چیای قەندیل، قوتابخانەی بۆ منداڵانی ئاوارە دروست كردووە، بۆ ئەوەی لە خوێندن دانەبڕێن. لە زۆر شوێنیش كە قوتابیان كێشەی گواستنەوەیان هەبووە، بەهانایانەوە چوون و ئاسانكارییان بۆ كراوە.
سەبارەت بە منداڵانی ناو كەمپەكانیش ئاشكرای كرد، لەو كەمپانەدا كە دەزگای خێرخوازیی بارزانی سەرپەرشتییان دەكات، زیاتر لە 90 ناوەندی خوێندن و 68،000 قوتابی هەن. بەڵام هاوكارییە نێودەوڵەتییەكان زۆر كەمیان كردووە و هەندێكیشیان هەر نەماون.
بەڕێز سەرۆكی دەزگای خێرخوازیی بارزانی، لە كۆتایی وتارەكەیدا داوای لە حكومەت و خێرخوازن و رێكخراوە مرۆیی و نێودەوڵەتییەكان كرد، بە هەموو شێوەیەك پاڵیشتیی پرۆسەی خوێندن بكەن.