كونسوڵی گشتیی وڵاتی ئەڵمانیا لە هەرێمی كوردستان – هەولێر، سەردانی سەرۆكایەتیی دەزگای خێرخوازیی بارزانی(BCF) دەكات و دەخوازێت رێكخراوەكانی هاریكاریی مرۆیی لە ئەڵمانیا و دەزگای خێرخوازیی بارزانی زیاتر كار و چالاكیی هاوبەش ئەنجام بدەن.
بەڕێز كڵاوس ستریچەر كونسوڵی گشتیی وڵاتی ئەڵمانیا لە هەرێمی كوردستان – هەولێر، رێككەوتی 23ی10ی2023 سەردانی سەرۆكایەتیی دەزگای خێرخوازیی بارزانی لە هەولێر كرد و لە لایەن بەڕێزان موسا ئەحمەد سەرۆكی دەزگای خێرخوازیی بارزانی و ئیبراهیم سەمین جێگری سەرۆكی دەزگای خێرخوازیی بارزانی بە گەرمی پێشوازی لێ كرا.
لەو دیدارەدا دوای كورتەباسێك لەبارەی دەزگای خێرخوازیی بارزانی و پیشاندانی ڤیدیۆی كاروچالاكییەكانی دەزگا لە ماوەی 18 ساڵی رابردوو، رەوشی پەنابەر و ئاوارەكان لە هەرێمی كوردستان و هاوكارییە مرۆییەكانی دەزگای خێرخوازیی بارزانی لە سێكتەرە جیاوازەكان كەوتە بەر باس و بەڕێز كونسوڵی گشتیی ئەڵمانیا لە هەولێر، سەرسامیی و سوپاس و پێزانینی بۆ ئەو هاریكارییانە دەربڕی. هاوكات هیوای خواست وڵاتی رێكخراوەكانی هاریكاریی مرۆیی لە ئەڵمانیا و دەزگای خێرخوازیی بارزانی زیاتر كار و چالاكیی هاوبەش ئەنجام بدەن.
