دەزگای خێرخوازیی بارزانی، سەرەڕای نەمانی هاوكاریی ڕێكخراوە نێودەوڵەتییەكانی سەر بە نەتەوە یەكگرتووەكان، لە كردنەوەی خولەكانی پەروەردەیی، پیشەیی، هونەری و…هتد، لەناو كەمپەكانی ئاوارە و پەنابەران و لە دەرەوەی كەمپەكانیش بەردەوامە، ئەو خولانەش كاریگەریی بەرچاویان لە ژیانی بەشداربووانی خۆلەكان هەبووە و تەنیا لە مانگی ئایار 1،205 كەس لەو خوڵانە سوودمەند بوون.
دەزگای خێرخوازیی بارزانی، هەر لە مانگی ئایاری ئەمساڵ (2026)، جگە لە كردنەوەی خولەكانی فریاگوزاریی سەرەتایی و فریاكەوتنی خێرا بۆ زیاتر لە 750 كارمەند لە هەموو نووسینگەكانی دەزگا و پێشكەشكردنی سیمینارەكانی ڕووبەڕووبوونەوەی ماددە هۆشبەركان كە سەدان كەس لێی سوودمەند بوون، لە كەمپەكانی ئاوارە و پەنابەران و لە دەرەوەی كەمپەكانیش 49 خولی پیشەیی، پەروەردەیی، هونەری و نەهێشتنی نەخوێندەواری كردووەتەوە، كە زياتر لە 455 كەس لەو خولانە سوودمەند بوون.
دەزگای خێرخوازیی بارزانی بە هەماهەنگی و پاڵپشتیی بەخشەر و خێرخوازانی ناوخۆ و ڕێکخراوەكانی هاریکاربەخش، ڕۆڵی گەورەی لە خزمەتکردنی چین و توێژەکانی(ئاوارە و پەنابەر، خەڵكی لێقەوماو و كەمداهات و كەسانی بێدەرەتان لە هەرێمی كوردستان و پارێزگاکانی عێراق و لە دەرەوەی وڵاتیش) هەبووە.
دەزگا، بە مەبەستی (فێركاری، دروستكردنی بەهرە، ڕەخساندنی دەرفەتی كار و فەراهەمكردنی داهات بۆ تاك و خێزان لە كاتی قەیرانەكاندا)، بایەخی زۆری بە دروستکردنی بنکە و سەنتەرە ڕۆشنبیری و هونەری و پیشەییەکان داوە، کە تیایاندا خول و ڕاهێنانی جۆراوجۆر بۆ فێرخوازان دەکرێنەوە.
دەزگای خێرخوازیی بارزانی 15 سەنتەری پیشەیی و ڕۆشنبیری بەڕێوە دەبات، كە 11یان لە ناو كەمپی ئاوارە و پەنابەراندان و هەر لە ڕێگەی ئەم ناوەندانەی ڕۆشنبیری و مەشقە پیشەیی و ڕاهێنانەكانیانەوە، ساڵانە بە هەزاران كەس لە خولەكانی(كۆمپیوتەر، كارەبا، دروومانی جلوبەرگ، بەرهەمهێنانی خۆراك، كاری دەستی، ڕستن و چنین و جوانكاری و…هتد) سوودمەند دەبن.
ئا: سالار بابەشێخ
