دەزگای خێرخوازیی بارزانی، لە بەردەوامیی هەوڵە مرۆیی و گەشەپێدانییەکانیدا، لە مانگی تەمووزی ساڵی 2026دا کۆمەڵێک پڕۆژە، هاوکاریی فریاگوزاری، ڕێککەوتننامەی ستراتیژی و خولی کارامەیی لە سەرجەم پارێزگاکانی هەرێمی کوردستان، ناوچە دابڕێنراوەکان و ڕوژئاوای کوردستان بەڕێوە برد. ئەم چالاکییانە سێکتەرە جیاوازەکانی وەک تەندروستی، پەروەردە و ڕاهێنان، هاوکاریی ئاوارە و پەنابەڕان، و پشتگیریکردنی خاوەن پێداویستییە تایبەتەکان و منداڵانی ئازیزی لەخۆگرت.
کەرتی تەندروستی و هەڵمەتە پزیشکییەکان
کەرتی تەندروستی بەشێکی گەورەی لە چالاکییەکانی دەزگا پێکدەهێنا، کە تێیدا چەندین هەنگاوی ستراتیژی و هاوکاریی مەیدانی جێبەجێ کران:
نوێکردنەوەی یاداشتنامەی سەنتەری نایابی بۆ چاودێریی ئاڵۆز: بە چاودێریی نووسینگەی مەلا مستەفا بارزانی و بە هاوبەشی لەگەڵ ڕێکخراوی Swisscross، وەزارەتی تەندروستی و ئەنجومەنی (KHCMS)، یاداشتنامەی پڕۆژەکە نوێ کرایەوە کە لە دوو ساڵی ڕابردوودا 500 نەشتەرگەریی پسپۆڕی و پشکنینی بۆ 1,500 کەس بە خۆڕایی ئەنجام داوە.
هەڵمەتی نیشتمانی بەرامبەر شێرپەنجە: لە 27/7/2026 لە زانکۆی سۆران بە ئامادەبوونی بەرپرسانی باڵا و بە سپۆنسەری Empire، هەڵمەتێکی هاوبەش لەژێر دروشمی «بە یەکەوە بەرەو کۆمەڵگەیەک بەدوور لە شێرپەنجە» ڕاگەیەندرا.
پڕۆژەی “خەندە بۆ منداڵان”: لە 29/7/2026 یاداشتنامەیەک لەگەڵ سەنتەری Smile Infinity بۆ ماوەی ساڵێک واژۆ کرا بۆ چاودێریی تەندروستیی دەم و ددانی 60 منداڵی ئازیز و ئەنجامدانی هەڵمەتی پشکنین لە ناوچە دوورەدەستەکان.
پشکنینی چاو و ددان: لە 28/7/2026 بە هاوبەشی لەگەڵ سەنتەری ئوردنی بۆ چاو، پشکنین بۆ 100 منداڵی ئازیز لە سلێمانی و هەڵەبجە ئەنجام درا.
هاوکاریی نەخۆشخانەکانی ڕۆژئاوا: لە قامشلۆ و حەسەکە لە ڕێکەوتەکانی 6 و 7 و 15ی تەمووزدا، زیاتر لە 185 کارتۆن دەرمان و پێداویستیی پزیشکی بۆ نەخۆشخانەکانی حەسەکە، زەرگان، تل تەمر، تل مەعرووف، تیشێ و ڕازی دابین کران.
ڕووبەڕووبوونەوەی ماددە هۆشبەرەکان: تیمەکانی دەزگا لە پێشانگەی نێودەوڵەتیی میتس (METS) هەڵمەتێکی هۆشیارییان لەژێر دروشمی «بەیەکەوە بەرەو کۆمەڵگەیەکی تەندروست و ساخڵەم» ئەنجام دا.
پەروەردە، ڕاهێنان و گەشەپێدانی تواناکان
دەزگای خێرخوازیی بارزانی گرنگییەکی تایبەتی بە بەرزکردنەوەی ئاستی کارامەییی کارمەندان، قوتابیان و گەنجان داوە:
تەکنەلۆژیا و ژیریی دەستکرد (AI): لە 29/7/2026 خولێکی ڕاهێنان لەسەر بەکارهێنانی تەکنەلۆژیا و ژیریی دەستکرد لە ژینگەی کارکردندا بۆ قوتابیانی مەشقی هاوینە لە هەولێر دەستی پێکرد.
سیمیناری فەلسەفەی بارزانی: لە 28/7 لە هەولێر بۆ 50 خۆبەخشی پڕۆژەی «شیاندنەوەی خۆبەخش» و لە 30/7 لە هەڵەبجە بۆ کارمەندانی دەزگا، سیمینار لەسەر بنەما مرۆیی و نەتەوەییەکانی فەلسەفەی بارزانی بەڕێوەچوو.
بەڕێوەبردنی دڵەڕاوکێ (سترێس): لە 26 و 27/7 سیمینارێکی دوو ڕۆژەی ڕاهێنان بۆ کارمەندانی نووسینگەی گەرمیان لەلایەن د. پگاه سەیدی پێشکەش کرا.
ئامادەکاری بۆ بازاڕی کار: لە 28/7 لە ئاکرێ وۆرکشۆپێک بۆ 28 دەرچوو و فەرمانبەر بەڕێوەچوو؛ هەروەها لە دهۆک خولێکی چارەسەرکردنی کێشەکان بۆ 22 کارمەند و لە زانکۆی ئەمریکی خولی AAP بەرێوەچوو.
پەرەپێدانی ئەکادیمی و فێرکاری: بەڕێوەبردنی وێبیناری کەشوهەوا لەگەڵ زانکۆی سۆران (1/7)، دیدار لەگەڵ شاندی زانکۆی العراقیة (8/7)، و خولەکانی زمانی کوردی لە عەفرین و ئینگلیزی لە هەڵەبجە و باسرمە و هەولێر.
پشتیوانیکردنی منداڵانی ئازیز، ئافرهتان و خاوەن پێداویستییە تایبەتەکان
ماڵی ئازیزان و منداڵان: ئەنجامدانی وۆرکشۆپی «ئەتەچیمنت» بۆ 41 کارمەندی ماڵی ئازیزان، ئەنجامدانی چالاکیی مەلەوانی و دیاری بۆ 72 منداڵی ئازیز لە هەولێر، بەڕێوەبردنی ئاهەنگی هونەری بۆ 250 منداڵ و خێزان لە کەمپی باسرمە بە بەشداریی ڕۆنی جان حەسۆ، و گەشتی شاری یاریی دیوان مۆڵ بۆ منداڵانی ئازیزی کەلار.
بەهێزکردنی ئافرەتان: تەواوبوونی خولی دروومانی جلوبەرگ بۆ 14 ئافرەت لە کەمپی دارەشەکران و دەستپێکردنی خولێکی تر لە کەمپی باسرمە.
خاوەن پێداویستییە تایبەتەکان: دابینکردنی کورسیی جووڵاو و ئامێری یارمەتیدەر بۆ 8 کەس لە هەولێر بە هاوبەشی لەگەڵ LDS، پێشوازی لە سەرۆکی کۆمەڵەی هیمۆفیلیای کوردستان و وەرگرتنی خەڵاتی ڕێزلێنانی یانەی دهۆک.
هاوکاریی فریاگوزاری و خێزانە کەمداهاتەکان
دابەشکردنی خۆراک: دابەشکردنی سەبەتەی خۆراک لە ئاکرێ (50 خێزان)، کەمپەکانی حەسەن شام و خازر (214 خێزان)، گوندی بێدیال لە بارزان (17 خێزان)، و دابەشکردنی گۆشتی سوور لە کەمپی خازر (129 خێزان).
کەمپەکان و زیانلێکەوتووان: دابەشکردنی 5,085 خێوەت لە کەمپەکانی بێرسڤ، باجدکەندال و خانکێ بە هەماهەنگیی UNHCR؛ هاوکاریکردنی خێزانە ئاگرلێکەوتووەکانی کەمپی حەسەن شام U3 و جەندێرێس لە عەفرین.
بەرهەمهێنانی سینەمایی و دەنگی مرۆڤایەتی
فیلمی دۆکیومێنتاریی «REPATRIATION» (گەڕانەوە بۆ نیشتمان) کورتەفیلمێکی بەرهەمهێنراوی دەزگای خێرخوازیی بارزانییە (دەرهێنانی ستار ئەحمەد و پڕۆدیوسەریی سەرەکی ڕەواج حاجی)، سەرکەوت بۆ قۆناغی کۆتایی فێستیڤاڵی نێودەوڵەتیی فیلمی ئیندی لە پاریس و هەڵبژێردرا بۆ ڕێوڕەسمی کۆتایی لە ئۆسلۆ، تا دەنگی کۆچبەران بە ئامرازێکی هونەری بگەیەنێتە جیهان.
ئا: سالار بابهشێخ
