Di çarçoveya hewildanên mirovî yên berdewam ên Dezgeha Xêrxwaziya Barzanî de, ji bo piştgirîkirina malbatên hejar û kêmdahat û bi mebesta gihandina destê alîkariyê di rojên cejnê de, projeyên Cejna Qurbana Pîroz a sala 2026an ji aliyê Dezgeha Xêrxwaziya Barzanî û bi hevkarî û sponseriya xêrxwazan, bi serkeftî û di dema xwe ya diyarkirî de hatin cîbicîkirin.
Ev kampanya neteweyî ya berfireh ku bi çavdêrî û plana hûr a tîmên meydanî yên dezgehê birêve çû, karî rûyekî geş û tije hevxemî pêşkêş bike. Di vê kampanyaya mirovî de, bi giştî şeş projeyên stratejîk û cuda di du sektorên sereke de hatin encamdan, ku tê de 26,570 malbat û 135,832 kes di şahiyên cejnê de hatin parvekirin û alîkariyên cûrbecûr gihîştin wan.
Sektora Yekem: Ewlehiya xwarinê û dabînkirina pêdiviyên sereke
Ev sektor wek her dem pişka herî mezin a alîkariyên kampanyayê girt, ku armanca wê ya rasterast dabînkirina aramiya xwarinê û tije kirina pêdiviyên sereke bû di rojên cejnê de. Dezgeha Xêrxwaziya Barzanî bi piştgiriya darayî ya sponserên dilsoz, di vê sektora girîng de bi giştî 26,570 malbat (ku bi hûrgulî dike 135,507 kes) ji van alîkariyan sûdmend kirin, ku li ser sê projeyên sereke hatin dabeşkirin:
Projeya dabînkirina selikên xwarinê yên cejnê: Ev proje wek qonaxa herî mezin a kampanyayê tê hesibandin, ku tê de bi şêweyekî birêkûpêk selikên xwarinê yên tije ji madeyên sereke gihandine 13,270 malbatan, ku bi giştî 67,677 kes ji vê alîkariya rasterast sûdmend bûn.
Projeya dabeşkirina ard: Ji ber girîngiya vê madeya sereke di jiyana rojane ya malbatan de, projeyeke taybet ji bo dabeşkirina ard hat cîbicîkirin, ku tê de barekî giran ji ser milê 6,800 malbatan (ku dike 34,680 kes) hat kêmkirin.
Projeya dabeşkirina goştê qurbanê: Hevdem digel dabeşkirina kevneşopiya pîroz a Cejna Qurbanê, tîmên meydanî di rojên yekem ên cejnê de dest bi dabeşkirina goştê qurbanê li ser malbatan kirin, ku tê de 6,500 malbat (ku dike 33,150 kes) sûdmend bûn û şahiya cejnê gihîşt malên wan.
Sektora Duyem: Kelupelên nexwarinê (NFI) û dabînkirina cilûbergên cejnê ji bo sêwiyan (ezîzan)
Di vê sektorê de, kampanyaya Dezgeha Xêrxwaziya Barzanî bêtir giringî da aliyê mirovî, derûnî û civakî, ku taybet bû bi kirîn û dabînkirina cilûbergên nû yên cejnê ji bo zarokan, bêserperştan û sêwiyên li deverên cuda. Armanca vê pêngava hevbeş a dezgeh û sponseran, ne tenê dabînkirina pêdiviyan bû, belku çandina şahiyê bû di dilê vê tebeqeyê de di rojên cejnê de. Di vê sektorê de bi giştî 325 kes sûdmend bûn, ku li gorî cografyaya herêman bi vî rengî hatin dabeşkirin:
Cilûbergên cejnê ji bo sêwiyên parêzgeha Nînewayê: Proje bi şêweyekî berfireh kirîna cilûbergên nû û şayiste ji bo 220 kesan li vê parêzgehê li xwe girt û xweşiyê xistin nav malên wan.
Cilûbergên cejnê ji bo sêwiyên parêzgeha Helebceyê: Di vê projeya mirovî de, bi serkeftî pêdiviyên cilûbergên cejnê ji bo 90 kesên vî bajarî hatin dabînkirin.
Cilûbergên cejnê ji bo sêwiyên parêzgeha Hewlêrê: Li vir jî projeyê bi serkeftî armancên xwe pêk anîn û cilûbergên nû ji bo 15 sêwiyên vî bajarî hatin dabînkirin.
Ev serkeftina mezin a projeyên Cejna Qurbana Pîroz a sala 2026an, di pileya yekem de vedigere bo piştgiriya berdewam a sponser û xêrxwazan û paşê jî bo dilsozî û keda bêrawestan a tîmên cîbicîkar ên Dezgeha Xêrxwaziya Barzanî li meydanê. Tevî astengiyên lojîstîkî, hemû ev proje di dema xwe ya diyarkirî de û beriya bidawîhatina rojên cejnê gihîştin cihê xwe. Ev proje nîşan da ku hevkarî û hevbeşiya navbera dezgeh û sponserên mirovî dikare guhertineke rastîn çêbike û bibe alîkariyeke mezin bo kêmkirina barê giran ê li ser milê hezaran malbatan û çandina hêviyeke nû di civakê de.
