Di bin rênimayî û çavdêriya nivîsîngeha rêzdar Mela Mistefa Barzanî de, Dezgeha Xêrxwaziya Barzanî bi hevkariya ligel rêxistina mirovî ya Swîsreyê Swisscross, û bi hevahengiya ligel Wezareta Tenduristiyê ya Hikûmeta Herêma Kurdistanê û Encûmena Bilind a Kurdistanê bo Pisporiyên Pizîşkî (KHCMS), yadaştnameya lêktêgihiştinê (MoU) bo berdewamî û pêşxistina projeya Navenda Nayab a bo Çavdêriya Aloz li Kurdistanê nû kir.
Ev pengava giring, dûpatkirina pabendbûna hemû aliyên hevbeş e bo pêşxistina sîstema çavdêriya tenduristiyê ya pispor, bihêzkirina hevkarî û hevahengiya di navbera saziyên peywendîdar de û berfirehkirina xizmetguzariyên tenduristiyê yên taybet ji bo wan nexweşên ku li Herêma Kurdistanê pêdiviya wan bi çavdêrî û çareseriyê heye.
Di dema du salên borî de, di çarçoveya vê projeya hevbeş de, pişkinînên pisporî ji bo nêzîkî 1500 nexweşî hatine kirin û nêzîkî 500 neştergeriyên pispor bi serkeftî hatine encamdan.
Ev hevkariya mirovî bûye sedema dabînkirina xizmetguzariyeke tenduristiyê ya jiyanbexş bo bi sedan malbatên lêqewmî û kêmdahat, ku bi awayekî bêberanber (bêpere), hêviyeke nû bo jiyana wan vegerandiye.
Nûkirina vê yadaştnameyê gaveke stratejîk a giring e bo berdewamiya van destkeftiyan û berfirehkirina xizmetguzariyên pispor, bi awayekî ku hejmareke zêdetir a nexweşan bikaribin sûdê ji xizmetguzariyên tenduristiyê yên astabilind werbigirin.
Dezgeha Xêrxwaziya Barzanî her dem baweriya xwe bi giringiya hevkariya navdewletî û saziyan aniye. Ev proje jî mînakeke serkeftî ya wê hevkariyê ye ku bi armanca xizmetkirina mirovan û parastina jiyana hemwelatiyan tê encamdan.
Dezgeha Xêrxwaziya Barzanî spasiya xwe pêşkêşî birêz Mela Mistefa Barzanî, rêxistina Swisscross, Wezareta Tenduristiyê ya Hikûmeta Herêma Kurdistanê, Encûmena Bilind a Kurdistanê bo Pisporiyên Pizîşkî (KHCMS) û hemû pizîşk, kadroyên tenduristiyê, hevbeş û karmendên peywendîdar dike ku bi hewl û dilsoziya xwe û pabendbûna wan bi erka mirovî, di dabînkirina xizmetguzariyên tenduristiyê û hêvî dayîna bi hezaran nexweş û malbatên hewcedar de berdewam bûn.
