Beşek ji çalakiyên Dezgeha Xêrxwaziya Barzanî di meha Hezîrana 2026an de

Li kampa Hesen Şamê pêdiviyên xwendinê hatin dabeşkirin
Bi hevahengiya Dezgeha Xêrxwaziya Barzanî û bi piştgiriya rêxistina “Islamic Relief”, roja 16/06/2026an li kampa Hesen Şam U2 (parêzgeha Hewlêrê), pêdiviyên xwendin û nivîsandinê li ser 87 xwendekaran hatin dabeşkirin.
Berdewamiya van çalakiyan roleke giring di pêşxistina şiyan û bilindkirina moralê xwendekarên nav kampan de dileyize.
Dezgeha Xêrxwaziya Barzanî bi hevkariya dezgeha “LDS” nexweşxaneyek li Silêmaniyê nûjen kir
Dezgeha Xêrxwaziya Barzanî, bi hevkariya dezgeha LDS a Amerîkî, roja 18/06/2026an li Silêmaniyê projeya nûjenkirina Nexweşxaneya Soya Derûnî bi dawî anî. Têçûyê projeyê 22 milyon û 204 hezar û 500 dînar bû û cîbicîkirina wê sê mehan dewam kir.
Dabeşkirina alîkariyên xorakê li kampên Xazir û Hesen Şamê
Dezgeha Xêrxwaziya Barzanî bi hevkariya grûpa “Beranetî”, roja 18/06/2026an sebeteyên xorakê û ard li kampa Hesen Şam U2 dabeş kirin ku 91 malbat (435 kes) jê sûdmend bûn. Di heman demê de, heman alîkarî li kampa Xazirê li ser 145 malbatan hatin dabeşkirin.
Bi helkefta Roja Cîhanî ya Penaberan merasîmeke taybet li Hewlêrê hat lidarxistin
Dezgeha Xêrxwaziya Barzanî di Roja Cîhanî ya Penaberan de, bi hevahengiya Fermangeha Peywendiyên Derve û Komîsyona Bilind a Penaberan a Neteweyên Yekbûyî (UNHCR), bi amadebûna Wezîrê Navxwe, Parêzgarê Hewlêrê û Rêveberê JCCyê, merasîmeke taybet li dar xist.
Rêber Ehmed, Wezîrê Navxwe ya Hikûmeta Herêma Kurdistanê:
“Ev çanda mirovî bi mîhrabaniya Serok Mesûd Barzanî hatiye avakirin, gava ku biryara dîrokî hat dayîn ku her kesê daxwaza parastinê bike, neyê redkirin.”
Musa Ehmed, Serokê Dezgeha Xêrxwaziya Barzanî:
“Piştî kêmkirina alîkariyên ajans û rêxistinan, niha barê giran ketiye ser milê Hikûmeta Herêma Kurdistanê û Dezgeha Xêrxwaziya Barzanî.”
Toby Harward, Nûnerê UNHCR li Iraqê:
“Em ê soza parastinê bi cih bînin heta ku her kes di ewlehiyê de be.”
Sefîn Dizayî, Berpirsê Fermangeha Peywendiyên Derve:
“Vegera bo warên sereke mafê her kesî ye, lê divê ew veger di bin mercên aramî, ewlehî û jiyaneke şayiste de be.”
Dezgeha Xêrxwaziya Barzanî beşdarî civîna jûra operasyonên birêvebirina qeyranan bû
Civîna asayî ya jûra operasyonan ji bo birêvebirina qeyran û karesatan, roja 16/06/2026an bi serperştiya birêz Rêber Ehmed, Wezîrê Navxwe yê Hikûmeta Herêma Kurdistanê hat lidarxistin.
Îsmaîl Ebdulezîz, endamê desteya kargêrî ya BCF wek nûnerê dezgehê ligel berpirsê UNDP û nûnerên saziyên pêwendîdar beşdar bû.
Wezîrê Navxwe spasiya rola bibandor a BCF di qonaxên amadekarî û hevahengiya kêmkirina metirsiyên qeyranan de kir.
Dezgeha Xêrxwaziya Barzanî û Dezgeha Stirling piştgiriya xwe bo karkirina bi hev re nû kirin
Musa Ehmed, Serokê Dezgeha Xêrxwaziya Barzanî, roja 21/06/2026an pêşwazî li Mihemed Dehab, Berpirsê Herêmî yê rêxistina “Stirling Foundation” kir. Mijara sereke ya guftûgoyan gotûbêjkirina karên hevbeş, serdana projeyan û dûpatkirina piştgiriyê bo xebata bi hev re bû.
Mala Kurdên Feylî mertala rêzlênanê pêşkêşî Dezgeha Xêrxwaziya Barzanî kir
Musa Ehmed, Serokê Dezgeha Xêrxwaziya Barzanî roja 21/06/2026an pêşwazî li şandeke bilind a “Mala Kurdên Feylî” kir. Şandê bi helkefta pêzanîn bo rola pêşeng a BCF di pêşkêşkirina alîkariyên berdewam bo mirovahiyê û hemû pêkhateyan, qelxanê rêzlênanê yê taybet pêşkêşî Musa Ehmed kir.
Di civînê de her du aliyan tekezî li ser giringiya pêşxistina peywendiyan bo xizmeta zêdetir a civakê kirin.
Li Kampa Hesen Şam alîkariya xwarinê tê belavkirin
Dezgeha Xêrxwazî ya Barzanî bi piştgiriya xêrxwazekî, di dîroka 21/6/2026 de, li Kampa Hesen Şam U3 li sînorê parêzgeha Hewlêrê, xwarinên hişk û ard bi ser malbatên nav kampê de belav kir.
196 malbat (1875 kes) ji vê alîkariya mirovî sûd wergirtin. Ev gava han jî beşek e ji hewldanên berdewam ji bo piştgirîkirina malbatên hewcedar û alîkariya wan di dabînkirina pêdiviyên sereke yên jiyanê de.
Zarokên Kampa Dibegê tên kêfxweşkirin
Dezgeha Xêrxwazî ya Barzanî, bi hevkariya rêxistina Islamic Relief, di dîroka 21/6/2026 de, li Kampa Dibegê li sînorê parêzgeha Hewlêrê, diyarî bi ser 205 zarokên kampê de belav kir.
Armanca vê çalakiyê kêfxweşkirina zarokan û bihêzkirina hesta bextewarî û dilniyayiyê di navbera wan de bû. Ev cure çalakî beşek in ji hewldanên berdewam ji bo piştgiriya zarokan û baştirkirina rewşa wan a derûnî û civakî.
Şandeke Parlementoya Kanadayê serdana Dezgeha Xêrxwazî ya Barzanî dike
Dr. Îbrahîm Semîn, Cîgirê Serokê Dezgeha Xêrxwazî ya Barzanî, roja duşemê di dîroka 22/6/2026 de li serokatiya dezgehê li Hewlêrê, pêşwazî li şandeke Parlementoya Kanadayê kir, ku pêk dihat ji Ziyad Ebulteyif, endamê parlementoya Kanadayê li ser lîsteya Partiya Parêzerên Opozîsyonê, Ehmed Husên endamê parlementoyê li ser lîsteya Partiya Lîberal a desthilatdar, Rehîm Reşîdî berpirsê Ofîsa Pêwendiyên Navneteweyî yên Konfederasyona Revenda Kurdistanî, Haşim Sindî şêwirmendê Konfederasyona Revenda Kurdistanî.
Şande bi rêya Konfederasyona Revenda Kurdistanî hatibû, armanca wê serdanê jî ji nêzîk ve nasîna Dezgeha Xêrxwazî ya Barzanî û agahdarbûna ji kar û çalakiyên dezgehê bû, her wiha derbirîna spas û pêzanînê bo wan kar û projeyên giring ku Dezgeha Xêrxwazî ya Barzanî encam daye.
Ji aliyê xwe ve Cîgirê Serokê Dezgeha Xêrxwazî ya Barzanî, spasîya wê serdanê kir û hêviya serkeftinê ji wan re xwest.
Kelar – Dabînkirina cilûbergan bo zarokên azîz
Di çarçoveya çalakiyên mirovî û xêrxwazî yên Dezgeha Xêrxwazî ya Barzanî de ji bo piştgiriya zarokên azîz (sêwî), di dîroka 24ê Hezîrana 2026an de, bi hevkariya xêrxwazekî li bajarokê Kelarê, cilûberg û pêlav bo 50 zarokan hatin dabînkirin.
Ev cure çalakî roleke bibandor û berçav heye di piştgiriya kesên hewcedar û bilindkirina giyanê hevkarî û hevsoziyê di nav civakê de.
Dezgeha Xêrxwazî ya Barzanî, di cîbicîkirina bername û projeyên mirovî de bi armanca baştirkirina jiyana malbatên hejar û piştgiriya çînên cuda yên civakê berdewam dibe.
Perwerdekirina karmendên projeya Kurdivia li Dihokê
Di çarçoveya projeyên Dezgeha Xêrxwazî ya Barzanî û dezgeha LDS ya Amerîkî de, di dîroka 24/6/2026 de, endazyarê mekanîk û pisporê warê hişkkirina fêkiyan, Hemîd Feyzula, ji Îranê ve gihîşte parêzgeha Dihokê bo perwerdekirina karmendên projeya Kurdivia, ku taybet e bi prose û qonaxên hişkkirina fêkiyan bi bikaranîna amêr û teknolojiya taybet.
Ev proje li Dihok, Akrê û Amêdiyê tê cîbicîkirin, û armanca sereke ya projeyê ew e ku piştgirî ji cotkarên navçeyê bê kirin û rêjeya berhemên xwecihî bê zêdekirin, di heman demê de jin bikaribin di warê proseya xwarinê û bazarkirinê de çalakiya xwe hebe û derfetên kar û çavkaniya dahata wan zêdetir bibe.
Dezgeha Xêrxwazî ya Barzanî:
Ji bo parastina ewlehiya civakê, divê em rûbirûyê “terora spî” bibin
Pirraniya welatên cîhanê, her sal di 26ê Hezîranê de bîranîna Roja Cîhanî ya Têkoşîna li dijî Bikaranîna Madeyên Hişbirê bi bîr tînin. Her di vê çarçoveyê de Dezgeha Xêrxwazî ya Barzanî bi dirûşma “Bi hev re ber bi civakeke bihêz û saxlem ve”, zêdetirî salek e di “Kampanyaya Niştimanî ya Rûbirûbûna Madeyên Hişbirê” de berdewam e.
Dabînkirina cilûbergan bo zarokên azîz li Zaxo û Batifa
Bi sponsoriya çar ciwanên xêrxwaz ji başûr, bakûr û rojavayê Kurdistanê, û bi hevrêziya ligel nûnertiya Dezgeha Xêrxwazî ya Barzanî li Zaxoyê, di dîroka 27/6/2026 de çalakiyeke mirovî bo dabînkirina cilûbergan bo 200 zarokên azîz (sêwî) li navenda Zaxoyê û bajarokê Batifa hate encamdan.
Ev çalakî bi armanca piştgiriya zarokên azîz û dabînkirina pêdiviyên wan ên seretayî hate encamdan û zarokên sûdmend kêfxweş kirin.
Belavkirina alîkariya xwarinê li navenda Zaxoyê û bajarokê Batifa
Bi sponsoriya çar ciwanên xêrxwaz ji başûr, bakûr û rojavayê Kurdistanê, û bi hevrêziya ligel nûnertiya Dezgeha Xêrxwazî ya Barzanî li Zaxoyê, di dîroka 27/6/2026 de alîkariya xwarinê bi ser 200 malbatan li navenda Zaxoyê û bajarokê Batifa de hate belavkirin. Di çarçoveya vê çalakiyê de, bo her malbatekê 30 kîlogram pêdiviyên xwarinê hate dabînkirin.
Ev çalakî bi armanca piştgiriya malbatên hejar û kêm-dahatan û sivikkirina rewşa jiyana wan hate encamdan.
Li Zaxoyê alîkariya darayî ji bo wan nexweşên ku nexweşiya wan a demdirêj heye tê kirin
Nûnertiya Dezgeha Xêrxwazî ya Barzanî li Amerîkayê, bi rêya nûnertiya dezgehê li Îdareya Serbixwe ya Zaxoyê, di dîroka 28/6/2026 de, li navenda Zaxoyê, alîkariya bi pere bi ser pênc nexweşan de belav kir, ku nexweşiya wan a demdirêj heye.
Ew alîkarî bi armanca sivikkirina rewşa wan a darayî û piştgiriya dermankirina wan a tenduristiyê pêşkêşî wan hate kirin.
Li Hewlêrê xuleke rahênanê bo karmendên Dezgeha Xêrxwazî ya Barzanî di warê kursiya bi teker de tê vekirin
Di çarçoveya projeya çavdêriya xwedan pêdiviyên taybet û bi hevrêziya ligel bexşerê projeyê (dezgeha LDS ya Amerîkî), di dîroka 28/6/2026 de li serokatiya Dezgeha Xêrxwazî ya Barzanî li Hewlêrê, xuleke nûkirina zanyariyan (Refreshing Training) bo karmendên dezgehê hate vekirin.
Di xulê de 18 karmendan ji hemû ofîs û nûnertiyên dezgehê, di nav de Germiyan, Silêmanî, Kerkûk, Helebce, Dihok, Hewlêr û nûnertiya Soranê, beşdarî kirin.
Xul ji aliyê Umêd Bîlal berpirsê projeya çavdêriya xwedan pêdiviyên taybet li Dezgeha Xêrxwazî ya Barzanî ve hate birêvebirin, di dawiya xulê de jî, bi awayekî pratîkî çar kursiyên livok bi ser kesên xwedan pêdivî de hatin belavkirin, da ku beşdarvan fêrbûnên xwe di warê nirxandin û belavkirina van amûran de bi awayekî kiryarî biceribînin.
Li Kampa Hesen Şam alîkariya xwarinê tê belavkirin
Dezgeha Xêrxwazî ya Barzanî, bi hevkariya Grûpa Beranetê, di dîroka 28/6/2026 de li Kampa Hesen Şam U3 li sînorê parêzgeha Hewlêrê, selikên xwarinê ligel 25 kîlogram ard bo her malbatekê belav kir. Ji wê alîkariyê 699 malbat (3,142 kes) ên rûniştvanên kampê sûdmend bûn.
Vekirina xulên pîşeyî, perwerdeyî, hunerî û hawarhatinê
Dezgeha Xêrxwazî ya Barzanî, tevî nemana alîkariya rêxistinên navneteweyî yên ser bi Neteweyên Yekbûyî ve, di vekirina xulên perwerdeyî, pîşeyî, hunerî û hwd de, li nav kampên koçber û penaberan û li derveyî kampan jî berdewam e, ew xul jî bandoreke berçav li ser jiyana beşdarvanên xulan hebûye.
Dezgeha Xêrxwazî ya Barzanî, her di meha Hezîrana îsal (2026) de, ji bilî vekirina xulên hawarhatina destpêkê û hawarhatina bilez û pêşkêşkirina semînerên rûbirûbûna madeyên hişbirê ku bi hezaran kes jê sûdmend bûne, li kampên koçber û penaberan û li derveyî kampan jî karîye di xulên pîşeyî, perwerdeyî, hunerî û nehêştina nexwendewariyê de, 578 kesan sûdmend bike.