لەچوارچێوەی پرۆژەی گۆشتی قوربان بەبۆنەی جەژنی قوربانەوە كە ساڵانە دەزگای خێرخوازیی بارزانی بەهاوكاری مانگی سووری ئیماراتی و دەوڵەتی كوەیت و خێرخوازانی كوردستان ئەنجامی دەدات، لەم ساڵدا لە دووەم رۆژی جەژنی قورباندا 500 خێزانی بێهاوژین كە خاوەنی منداڵن، گۆشتی قوربانی و پارسێلی خۆراك و تەندروستییان پێشكەش دەكرێت.
رێككەوتی 21/7/2021 لەچوارچێوەی پرۆژەكانی جەژنی دەزگای خێرخوازیی بارزانی و لە دووەم رۆژی جەژنی قورباندا، لە ئۆفیسی سەرەكی دەزگای خێرخوازیی بارزانی لەشاری هەولێر پرۆژەی دابەشكردنی گۆشتی قوربانی كە لەلایەن مانگی سووری ئیماراتییەوە دابینكرابوو لەگەڵ پارسێلی خۆراك و تەندروستی كە لەلایەن خێرخوازێك و دەزگاوە دابینكرابوون بەسەر 500 خێزاندا دابەشكرا.
سەبارەت بە چۆنێتی بەڕێوەچوونی پرۆژەكەو خستنەڕووی زانیاری زیاتر، بەڕێز عومەر ئەحمەد بەرپرسی بەشی ئازیزان و بێهاوژینانی دەزگای خێرخوازیی بارزانی رایگەیاند: وەك نەریتە ساڵانەكانی دەزگای خێرخوازیی بارزانی لە بۆنە تایبەتەكاندا بەرنامەی دابەشكردنی هاوكاری جۆراوجۆری هەیە بۆ ئەو منداڵانەی كە لەلایەن ئێمەوە تۆماركراون، لەمساڵداو لە مانگی رەمەزاندا بەرنامەی دابەشكردنی مووچەمان هەبوو بۆ 11121 منداڵ لەلایەن مانگی سووری ئیماراتی و 4139 منداڵی بێباوك كە لەلایەن كۆمپانیا و خواپێداوانی كوردستانەوە سپۆنسەریكرابوون بڕی 13.500.000 دۆلاری ئەمەریكی دابەشكران. هەروەها لەمساڵدا كۆمەڵێك چالاكی دیكەمان هەبوو بۆ جەژنی رەمەزان و جەژنی قوربان لە كڕینی جلوبەرگی جەژن بۆ منداڵانی بێباوك، لەگەڵ دابەشكردنی پارسێلی خۆراك و گۆشتی قوربانی، ئەوەی ئەمڕۆ ئەنجامی دەدەین، دابەشكردنی گۆشتی قوربانییە بەسپۆنسەری مانگی سووری ئیماراتی بۆ 500 منداڵی بێباوك (ئازیز).
هەروەها لەچالاكییەكی دیكەدا ئەمڕۆ ئەنجامی دەدەین بریتییە لە دابینكردنی پارسێلی خۆراك بۆ 500 خێزان كە منداڵی بێباوكیان هەیە لەلایەن خێرخواز (پارێزەر سەفین) و پارسێلی تەندروستیش لەلایەن دەزگای خێرخوازیی بارزانییەوە بۆ ئەم خێزانانە دابینكراوە.
هەروەها ئاماژەی بەوەشدا، جگە لە دابەشكردنی هاوكارییە جۆراوجۆرەكان، لەلایەكی دیكە كۆمەڵێك چالاكی تایبەت هەیە بۆ ئازیزان ئەنجامی دەدەین، لەوانە كردنەوەی خولی فێربوونی زمان و دابینكردنی كارتێكی تایبەت بە یانەی ئەسپسواری و ئەكواتارین و لە هەوڵداین لە ئاییندەدا كاری زیاتر و پرۆژەی هەمەڕەنگتر بۆ منداڵان و ئافرەتانی بێهاوژین ئەنجام بدەین.
