10 تۆن و نیو كەلوپەلی پزیشكی و 7100 پارسێلی خۆراك دابەش دەكرێت

دەزگای خێرخوازیی بارزانی و دەستەی فریاگوزاری كوەیتی ئەنجامی دەدەن
رۆژی یەكشەممە رێككەوتی 12/9/2021 لە دەزگای خێرخوازیی بارزانی بە ئامادەبوونی بەڕێزان (عومەر الكندری قونسوڵی گشتی دەوڵەتی كوەیت و د. سامان بەرزنجی وەزیری تەندروستی حكومەتی هەرێمی كوردستان و ئومێد خۆشناو پارێزگاری هەولێر و موسا ئەحمەد سەرۆكی دەزگای خێرخوازیی بارزانی) دوو پرۆژەی گرنگ راگەیەندرا، كە پرۆژەی یەكەم خۆی لە دابینكردنی كەلوپەلی پزیشكییە كە لەلایەن دەستەی فریاگوزاری كوەیتیەوە بەخشراوە و لەڕێگەی دەزگای خێرخوازیی بارزانییەوە رادەستی وەزارەتی تەندروستی حكومەتی هەرێمی كوردستان دەكرێت، كە خۆی لە 10 تۆن و نیو هاوكاری و ئامێری پزیشكی دەبینێتەوە كە نرخی پێداویستییەكان بە یەك ملیۆن یۆرۆ دەخەمڵێنرێن و سەرجەمیان لەوڵاتی ئەڵمانیا كڕدراون. هاوكات هەر لەكۆنگرە رۆژنامەوانییەكەدا پرۆژەی دووەم راگەیەندرا كە بە هاوبەشی نێوان دەزگای خێرخوازیی بارزانی و كۆمەڵەی فریاگوزاری كوەیتییە كە ئەویش خۆی لە دابەشكردنی (7100) پارسێلی خۆراك دەبینێتەوە و لە شارەكانی (كەركووك، نەینەوا، هەولێر، دیالە، دهۆك، سلێمانی، هەڵەبجە و بەغدا) دابەش دەكرێت.

لەسەرەتای پرێس كۆنفرانسەكەدا بەڕێز موسا ئەحمەد بەناوی دەزگای خێرخوازیی بارزانی بەخێرهاتنێكی گەرمی قونسوڵی دەوڵەتی كوەیت و میوانەكانی كرد و تیشكی خستەسەر ئەو هاوكارییانەی دەوڵەتی كوەیت بۆ ئاوارە و پەنابەران و حكومەتی هەرێمی كوردستان پێشكەشی كردووە. ئەمڕۆ بۆ دوو پرۆژەی گرنگ لێرەین كە ئەویش خۆی لە پرۆژەی دابەشكردنی 7100 پارسێلی خۆراك و پرۆژەی دابینكردنی كەلوپەلی تەندروستی دەبینێتەوە. بەسوپاسەوە هەردوو پرۆژەكە دەستەی فریاگوزاری كوەیتی سپۆنسەری هەردوو پرۆژەكەیان كردووە.
هەروەها ئاماژەی بەوەدا: لە پرۆژەی دابەشكردنی پارسێلی خۆراكدا لە 7 پارێزگای هەرێمی كوردستان و عێراق دابەش دەكرێت، هاوكات پرۆژەی دووەم خۆی لە دابینكردنی كەلوپەل و پێداویستی پزیشكییە كە بە 1 ملیۆن یۆرۆ خەمڵێنراوە و سەرجەمیان پێشكەشی وەزارەتی تەندروستی دەكەین.

دواتر بەڕێز (عومەر الكندری) قونسوڵی گشتی دەوڵەتی كوەیت لە هەرێمی كوردستان وتەیەكی پێشكەشكرد و رایگەیاند: سوپاسی دەزگای خێرخوازیی بارزانی و حكومەتی هەرێمی كوردستان دەكەین كە بەردەوام پاڵپشتی ئێمەبوون لە پێشكەشكردنی پرۆژەكانمان بۆ خەڵكی ناوخۆی كوردستان و ئاوارە و پەنابەران لە كەمپەكاندا. ئێمە بایەخێكی تایبەت بە كەرتی تەندروستی دەدەین، بەتایبەتی دوابەدوای سەرهەڵدانی پەتای ڤایرۆسی كۆرۆنا كە پێویستییەكی زۆریان بە كەلوپەلی پزیشكی و پێداویستییەكانی دیكە هەیە بۆ بەرەنگاربوونەوەی ئەو پەتا جیهانییە. ئێمە بە ئەركی دراوسێی دەزانین وەكو دراوسێیەكی عێراق و بەردەوام هەوڵدەدەین هاوكاری لەبوارە جیاوازەكاندا پێشكەش بكەین. پشتیوان بەخوا بەردەوام دەبین لەسەر پێشكەشكردنی ئەو هاوكارییانە.

پاشان بەڕێز د.سامان بەرزنجی وەزری تەندروستی حكومەتی هەرێمی كوردستان لەوتەیەكدا تیشكی خستەسەر گرنگی ئەم پرۆژەیە و رایگەیاند: سوپاسی دەوڵەتی كوەیت و دەزگای خێرخوازیی بارزانی دەكەین بۆ پێشكەشكردنی ژمارەیەكی زۆر لە كەلوپەلی نەشتەرگەری و چاودێری چڕ و كەلوپەلی پزیشكی بە وەزارەتی تەندروستی، ئێمە دەستخۆشییان لێدەكەین و ئومێدی بەردەوامی و سەركەوتنیان بۆ دەخوازین. هەروەها تیشكی خستەسەر بەردەوامی پەتای كۆرۆنا لە هەرێمی كوردستان و راگەیاند: بەهۆی بڵاوبوونەوەی ڤایرۆسی كۆرۆناوە گرفت بۆ كەرتی تەندروستی دروستبووە و فشارێكی زۆر لەسەر نەخۆشخانەكان هەیە و ئەمەش پێویستی بە ئامێر و كەلوپەل و پێداویستی دیكەی تەندروستی هەیە بۆ ئەوەی باشترین خزمەت پێشكەش بكەین.

شان بەڕێز (ئومێد خۆشناو) پارێزگاری هەولێر وتەیەكی پێشكەشكرد و راگەیاند: دەوڵةتی كوەیت پێشنییەكی زۆر جوانی لەهەرێمی كوردستان دا هەیە و لەرابردوودا خزمەتێكی بەرچاویان پێشكەشكردووە و بەردەوام پشتیوانی حكومەتی هەرێمی كوردستان بووە، ئەمڕۆش دەبینین كە دەوڵەتی كوەیت و قونسوڵگەری كوەیت لە هەرێمی كوردستان بەردەوامن لەپێشكەشكردنی هاوكارییە جۆراوجۆرەكانیان لەبواری خۆراكی و تەندروستیدا، ئێمە دەستخۆشییان لێدەكەین و ئومێدی بەردەوامی ئەو پاڵپشتییەیان بۆ دەخوازین. ئێمە پێویستییەكی زۆرمان بە ئامێری پزیشكی هەیە كە لە نەخۆشخانەكانی هەرێمی كوردستاندا كێشە و گرفتی كەمی ئامێرەكان هەیە، وەكو پارێزگای هەولێر سوپاسی دەوڵەت و قونسوڵگەری وڵاتی كوەیت و دەزگای خێرخوازیی بارزانی دەكەین، كە بەردەوام هەوڵی پاڵپشتیكردنی كەرتە گرنگەكانی حكومەتی هەرێمی كوردستان دەدەن.

Share on facebook
Facebook
Share on email
Email
Share on twitter
Twitter
Share on linkedin
LinkedIn
Share on pinterest
Pinterest