هەولێر… 500 خێزانی زیانلێكەوتووی لافاو هاوكاریكران

دەزگای خێرخوازیی بارزانی بەهاوكاری و هەماهەنگی لەگەڵ پارێزگای هەولێر و EJCC و مانگی سووی عێراقی، هاوكاری و پێداویستی جۆراوجۆر پێشكەش بە 500 خێزانی زیانلێكەوتووی لافاو لە گەڕەكەكانی (زێڕین، گوندی كۆری، گرد جوتیار، كۆڕێ و مەلا ئومەر) دەكەن.
پاش ئەوەی لە رێككەوتی 30/10/2021 بەهۆی بارانێكی بەخوڕ و دروستبوونی لافاو، چەند گەڕەكێكی سنووری پارێزگای هەولێر رووبەڕووی لافاو بوونەوەو زەرەرمەندبوون. دەستبەجێ تیمەكانی دەزگای خێرخوازیی بارزانی و پارێزگای هەولێر و لایەنە پەیوەندیدارەكان هاتنە سەر هێڵ بۆ چارەسەركردن و بەهاناچوونی لێقەوماوان.
دەزگای خێرخوازیی بارزانی بەپێی پلانی فریاكەوتنی خێرا، دەستبەجێ پلان و بەرنامەی بۆ ئەم رووداوە سرووشتییە داڕشت و لەڕێگەی120 کارمەندەوە دەستكرا بە جێبەجێكردنی و لە یەكەم هەنگاودا پرۆسەی هەژمارکردنی زیان لێکەوتوانیان ئەنجامدا، لەگەڵ تیمی پزیشکی مەیدانی دەزگای خێرخوازیی بارزانی و دابەشکردنی کەلوپەلی سەرەتای پزیشکی پێویست بەهاوبەشی بەڕێوەبەرایەتی گشتی تەندروستی هەولێر و مانگی سووری عێراقی ئەنجام درا، بەشێك لە خێزانەكان بەهۆی لافاوەوە ماڵ و حاڵیان لێ تێكچووبوو و پێویستیان بەشوێنی مانەوە هەبوو، تیمەكانی دەزگای خێرخوازیی بارزانی و پارێزگای هەولێر هەستان بە دابینكردنی شوێنی مانەوە بۆ ئەو خێزانانەی كە بێ ماڵ و حاڵ مابوونەوە. هاوكات هەمان رۆژ لەڕێگەی 5 تانكەرەوە ئاوی خواردنەوە بۆ خێزانە زەرەرمەندبووەكان دابینكرا و بەمەبەستی پاككردنەوەی ماڵە زەرەرمەندبووەكان 15 تانكەری ئاو بەدرێژایی رۆژ كاری پاككردنەوەی ئەو خانووانەیان ئەنجامدا كە لافاو گرتبوونیەوە.
لەپێناو زوو بەڕێوەچوونی پرۆسەی خاوێنكردنەوەی ماڵەكان لەرۆژی دواتر واتە 31/10/2021، 30 تانکەر ئاو و 60 کرێکار بۆ مەبەستی خاوێنکردنەوەو شوشتنی خانوە زیانلێکەوتووەکان دەست بەكاربوون لەگەڵ دابەشکردنی ئاوی پاك بۆ خواردنەوە لە رێگای 5 تانکەر بە درێژایی رۆژ. بەردەوام بوو.
بەشێك لە خێزانەكان بەهۆی خراپی رەوش و گوزەرانیان، لەلایەن دەزگای خێرخوازیی بارزانییەوە خواردنی گەرمیان بۆ دابینكرا كە زیاتر لە 70 كەس سوودمەندبوون، هاوكات كەلوپەلی ناوماڵە و دۆشەك و بەتانیش بەسەر خێزانە زیانلێكەوتووەكاندا دابەشكرا. كۆی گشتی خێزانی هاوكاریكراو بریتی بوو لە (500)، كە دەكاتە 2463 كەس.