دەزگای خیرخوازیی بارزانی (BCF) بە هەماهەنگی لەگەڵ رێكخراوی NRCی نەرویجی رێككەوتی 2022/11/29 بە بۆنەی گۆڕینی خوێندنی زمانی عەرەبی بۆ زمانی كوردی لە كەمپەكانی پەنابەران لە سنووری پارێزگای دهۆك ئاهەنگێكی ساز كرد.
لەو گۆڕانكارییەدا پەرتووكەكان و سیستەمی خوێندن كە پێشتر بە زمانی عەرەبی بوون، لەسەر داواكاریی دانیشتووانی كەمپەكە بۆ سەر زمانی كوردی (زمانی دایك) گۆڕان و هەموو قوتابیانی كەمپەكان لەو گۆڕانكارییە سوودمەند بوون.
دوای داواكاریی دانیشتووانی پێنج كەمپی پەناران لە سنووری پارێزگای دهۆك و رەزامەندیی بەڕێوەبەرایەتیی پەروەردەی گشتیی پارێزگاى دهۆك و UN و DMCR ، سیستەمی خوێندن لە پۆلی یەك تا چواری سەرەتایی لە زمانی عەرەبی بۆ سەر زمانی كوردی گۆڕدرا. ئەو گۆڕانكارییە دانیشتووانی كەمپەكانی پەنابەران و بە تایبەتی قوتابیانی دڵخۆش كرد.
شایانی باسە ئەو گۆڕانكارییە كەمپەكانی ئاوارەكان ناگرێتەوە كە زۆربەیان بە نەتەوە عەرەبن و بە زمانی خۆیان دەخوێنن.
