راگەیەندراوی ده‌زگای خێرخوازیی بارزانی سه‌باره‌ت راگرتنی کارەکانی له‌ شنگال

دەزگای خێرخوازیی بارزانی راگەیەندراوێک بەهۆی دەستگیرکردنی بەرپرسی ئۆفیسی شنگالی دەزگاوە و رێگریکردن لە کاروچالاکییەکانی بڵاو دەکاتەوە و داوا له‌ حكوومه‌تی عێراق و نه‌ته‌وه‌ یه‌كگرتووه‌كان و هێزی هاوپه‌یمانان و رێكخراوه‌ مرۆییه‌كان له‌ جیهاندا ده‌كات رێگه‌ نه‌ده‌ن‌ گروپه‌ چه‌كداره‌كانی ده‌ڤه‌ری شنگال ئه‌و ناوچه‌یه‌ بكه‌نه‌ گۆڕه‌پانی ململانێی خۆیان، چونكه‌ خه‌ڵكی سڤیلی شنگال پێویستیان به‌ زیاتر به‌ هاناوه‌ چوون و باشتركردنی ره‌وشی ژیان و بونیاتنانی ژێرخانی ده‌ڤه‌ره‌كه‌ هه‌یه‌‌.

دەقی راگەیەندراوی دەزگای خێرخوازیی بارزانی بەم شێوەیە:

له‌ رۆژی یه‌كه‌می داگیركردنی شنگال له‌ لایه‌ن تیرۆريستانی داعشه‌وه‌، ئێمه‌ وه‌كو ده‌زگای خێرخوازیی بارزانی له‌ رێگه‌ی فڕۆكه‌ و ئۆتۆمبێله‌وه‌ هاوكاری مرۆییمان گه‌یاندۆته‌ خه‌ڵكی سه‌ربه‌رزی شنگال و ته‌نها ده‌زگایش بووین كه‌ خه‌ڵكی سڤیلی ئه‌و ده‌ڤه‌ره‌مان به‌ ته‌نها جێنه‌هێشتووه‌، بۆ ئه‌وه‌ی له‌ نزیكه‌وه‌ پێداویستییه‌كانی وه‌كو ئاو، كاره‌با، قوتابخانه‌، بنكه‌ی ته‌ندروستی و جلوبەرگ و خۆراک سه‌رپه‌نایان بۆ دابین بكه‌ین. ئۆفیسێكمان له‌سه‌ر چیای شنگال كردۆته‌وه‌.

له‌ كاتی ئه‌نجامدانی ئه‌م ئه‌ركه‌ مرۆییه‌دا، چه‌ندین جار له‌ لایه‌ن چه‌كدارانی په‌كه‌كه‌وه‌ رێگری له‌ تیمه‌كانمان كراوه‌ و په‌لاماری ئۆفیسی ده‌زگا دراوه‌ كه‌ له‌سه‌ر چیای شنگاله‌، به‌ڵام بۆ ئه‌وه‌ی بتوانین به‌رده‌وامبین له‌ خزمه‌تكردن به‌ خه‌ڵكی ده‌ڤه‌ری شنگال بێده‌نگیمان به‌رانبه‌ر چه‌كدارانی په‌كه‌كه‌ هه‌ڵبژاردووه‌ و رۆژ به‌ رۆژ زیاتر هاوكاریمان پێشكه‌شی خه‌ڵكی ئه‌و ده‌ڤه‌ره‌ كردووه‌ و له‌ كۆنفرانسه‌ نێوده‌وڵه‌تییه‌كاندا ده‌نگی شنگال و شنگالییه‌كانمان گه‌یاندۆته‌ رێكخراوه‌ مرۆییه‌ جیهانییه‌كان. به‌ڵام به‌ داخه‌وه‌ دیاره‌ چه‌كدارانی په‌كه‌كه‌ له‌سه‌ر هه‌ڵویستی نامرۆڤانه‌ی خۆیان به‌رده‌وامن و رۆژی (28\4\2019) له‌ كاتی پێشكه‌شكردنی هاوكاری بۆ خه‌ڵكی شنگال له‌‌ لایه‌ن ده‌زگای خێرخوازیی بارزانی و رێكخراوی كه‌نیسه‌ی لێبراسكای ئه‌مریكی هه‌ڵده‌كوتنه‌سه‌ر كارمه‌ندانمان و به‌رپرسی ئۆفیسی ده‌زگای خێرخوازیی بارزانی له‌ شنگال ده‌گرن و زیندانی ده‌كه‌ن.

له‌ كاتێكدا به‌ توندی ئیدانه‌ی ئه‌م هه‌ڵوێسته‌ی چه‌كدارانی په‌كه‌كه‌ ده‌كه‌ین، هاوكات بۆ رای گشتی رایده‌گه‌یه‌نین كه‌ چیتر ناكرێت و ناتوانین به‌رده‌وام بین له‌ پێشكه‌شكردنی هاوكاری بۆ خه‌ڵكی ده‌ڤه‌ری شنگال، چونكه‌ ره‌فتاری چه‌كدارانی په‌كه‌كه‌ له‌ شنگال بارگاویه‌ له‌ توندوتیژی و دژی خه‌ڵكی سڤیلی ده‌ڤه‌ری شنگال و رێكخراوه‌ خێرخوازی و مرۆییه‌ ناوخۆی و نێوده‌وڵه‌تییه‌كان. ئه‌مه‌ش وا ده‌كات ژیانی خۆبه‌خش و كارمه‌ندانی ده‌زگاكه‌مان له‌ مه‌ترسیدابێت.

داوا له‌ حكوومه‌تی عێراق و نه‌ته‌وه‌ یه‌كگرتووه‌كان و هێزی هاوپه‌یمانان و رێكخراوه‌ مرۆییه‌كان له‌ جیهاندا ده‌كه‌ین رێگه‌ نه‌ده‌ن‌ گروپه‌ چه‌كداره‌كانی ده‌ڤه‌ری شنگال ئه‌و ناوچه‌یه‌ بكه‌نه‌ گۆڕه‌پانی ململانێی خۆیان، چونكه‌ خه‌ڵكی سڤیلی شنگال پێویستیان به‌ زیاتر به‌ هاناوه‌ چوون و باشتركردنی ره‌وشی ژیان و بونیاتنانی ژێرخانی ده‌ڤه‌ره‌كه‌ هه‌یه‌‌.

ده‌زگای خێرخوازیی بارزانی

30\4\2019

Share on facebook
Facebook
Share on email
Email
Share on twitter
Twitter
Share on linkedin
LinkedIn
Share on pinterest
Pinterest

پاڵپشتی ژیانێکی نوێ بکە