وتاری رێزدار مەسرور بارزانی، سەرۆکی بۆردی دامەزرێنەرانی دەزگای خێرخوازیی بارزانی

زۆر دڵخۆشم کە دەبینم ساڵ دوای ساڵ چالاکییە خێرخوازییەکانی دەزگای خێرخوازیی بارزانی گەشە دەستێنن و بەربڵاوتر دەبن، ئەمڕۆ سەرەڕای ئەو دۆخە سەختە ئابوورییەی بەهۆی بڵاوبوونەوەی پەتای کۆرۆنا وەک زۆربەی وڵاتانی جیهان، رووبەڕووی هەرێمی کوردستانیش بووەتەوە، کەچی خۆشبەختانە دەزگای خێرخوازیی بارزانی بەردەوامە لە بەخشین و یارمەتیدان و بە هاناوەچوونی خەڵکی کەمدەرامەت و لێقەوماو. وەک چۆن لە ساڵانی رابردووشدا بە هانای خەڵکی ئاوارە و دەربەدەر و ئەوانەدا چووە کە لە ترسی تیرۆر و تۆقاندن، ناوچەکانیان بە جێهێشت و روویان لە هەرێمی کوردستان کرد.

سوپاسی خەڵکی کوردستان دەکەم کە سەرەڕای هەموو قەیران و بارودۆخی سەختی دارایی، بەڵام زۆر میوان دۆستانە و بەخشندانە باوەشیان بۆ خەڵکی ئاوارە و پەنابەر لە عێراق و رۆژئاوای کوردستان و سوریا کردەوە، بە شێوەیەک کە خەڵکی کوردستان بووەتە نموونەیەکی گەشی مرۆڤدۆستی و لێبوردەیی لە جیهاندا. هیوادارم ئەو پەنابەر و ئاوارانە لە زووترین کاتدا و بە شێوەیەکی سەربەرزانە بگەڕێنەوە ناوچەکانیان.

 خاڵێکی گەشی دەزگای خێرخوازیی بارزانی لەم ساڵانەی رابردوودا ئەوەیە کە هاوکاری و یارمەتی خەڵکی هەژار و لێقەوماوی دەرەوەی هەرێمی کوردستان و عێراقیشی داوە. ئاشکرایە خەڵکی کوردستان هەرگیز هاوکاری و یارمەتییەکانی رێکخراوە مرۆییەکان لە رۆژانی سەختدا لە بیر ناکەن، بە تایبەتی لە سەرەتای راپەڕینی شکۆداری بەهاری 1991 و لە کاتی کۆڕەوە ملیۆنیەکەدا. بۆیە ئێستا مایەی شانازییە کە رێکخراوێکی خێرخوازی کوردستانی وەک دەزگای خێرخوازیی بارزانی، ئەم رۆڵە خێرخوازییە مرۆڤدۆستانەیە دەبینێت و بە بێ هیچ جیاوازییەکی ئایینی و ڕەگەزی و نەتەوەیی، هاوکاریی و یارمەتییەکانی دەگەیەنێتە خەڵکی کەمدەرامەت و لێقەوماو لە هەر ناوچەیەکی جیهاندا بن.

لێرەدا بە پێویستی دەزانم سوپاسی هەموو ئەو کەس و لایەن و وڵاتە هاریکاربەخش و رێکخراوە مرۆییەکان بکەم کە لە هەماهەنگیکردن و کارکردنی هاوبەش لەگەڵ دەزگای خێرخوازیی بارزانی بەردەوامن و بەهۆی ئەم هەماهەنگییە، دەزگای خێرخوازیی بارزانی لە پێشکەشکردنی هاوکاریی و بەخششەکانی بەردەوامە و لە گەشەکردندایە.

دەستخۆشیش لە کارمەندە ماندوونەناسەکانی دەزگای خێرخوازیی بارزانی دەکەم کە ئەرکی خۆیان بە باشترین شێوە بەجێ دەگەیەنن. بە ئومێدی گەشەکردن و بە خششی زیاتر.

مەسرور بارزانی

 سەرۆکی بۆردی دامەزرێنەرانی دەزگای خێرخوازیی بارزانی

Share on facebook
Facebook
Share on email
Email
Share on twitter
Twitter
Share on linkedin
LinkedIn
Share on pinterest
Pinterest

پاڵپشتی ژیانێکی نوێ بکە