Mûsa Ehmed, Serokê Dezgeha Xêrxwazî ya Barzanî, ragihand ku li ser raspardeya Serok Barzanî, di qonaxa yekem de 64 ton alîkarîya mirovî bi rêya 8 barhilgiran ji bo Çemçemal û navçeyên din ên ziyanberketî hatine şandin û ew ê berdewam bin.
Serokê Dezgeha Xêrxwazî ya Barzanî, îro Çarşemî (10ê Kanûnê 2025), di civîneke rojnamevaniyê de ragihand ku piştî hişyariyên keşnasî û meteorolojiyê yên di derbarê pêşbîniyên keşûhewayê û rûdana karesatên xwezayî û lehiyan, tîmên wan ên meydanî rasterast ketine amadebaşiyê.
Serokê Dezgeha Xêrxwazî ya Barzanî herwiha diyar kir ku piraniya ziyanên li nahiyeya Tekîye ya Çemçemalê, nahiyeya Rizgarî ya Kêlarê û navçeya Lêylanê ya Kerkûkê bûne.
Herwiha tekez kir ku hemû kar û çalakî û gihandina alîkariyan, wê bi hemahengîya tam bi aliyên pêwendîdar ên hikûmetê re li wan navçeyan bêne kirin.
Herwiha destnîşan kir ku ew ê bi rêya rêxistinên navdewletî û navxweyî, sermayedar û xêrxwazan hewl bidin alîkarîya zêdetir ji bo xelkê ziyanberketî kom bikin û hinek ji êş û azar û pirsgirêkên ziyanberketî yên li wan navçeyan kêm bikin.
